NASA adpravić astranaŭtaŭ u samy daloki kaśmičny palot u historyi
Upieršyniu za apošnija 50 hadoŭ ludzi znoŭ padlaciać da Miesiaca tak blizka i ŭpieršyniu palaciać ad Ziamli tak daloka.
U lutym 2026 hoda NASA płanuje ažyćciavić samy daloki ŭ historyi čałaviectva palot z udziełam ludziej. Misija «Artemida-2» stanie častkaj prahramy pa viartańni čałavieka na Miesiac, u jakoj udzielničajuć čatyry astranaŭty — troje z ZŠA i adzin z Kanady. Jany nie buduć vysadžvacca na Miesiac, ale stanuć pieršymi ludźmi, što z času «Apałona-17» u 1972 hodzie pakinuć arbitu Ziamli i pralaciać kala 9200 km za Miesiac, piša VVS.
«Artemida-2» pryznačana dla testavańnia ŭsich sistem pierad budučaj vysadkaj na Miesiac. Astranaŭty praviaduć dziesiacidzionny palot na borcie kapsuły «Aryjon», jakaja stanie ich domam na ŭvieś čas palotu. Kapsuła paśla vychadu na arbitu nakirujecca ŭ bok Miesiaca, zrobić ablot spadarožnika i vierniecca na Ziamlu.
Dyrektar zapusku Čarli Błekvieł-Tompsan paviedamiła, što rakieta praktyčna hatovaja, zaviaršajucca vyprabavańni kapsuły i naziemnych sistem.
Kiraŭnik palotu Džef Radzihen patłumačyŭ, što ekipaž pahłybicca ŭ kosmas dalej, čym chto-niebudź z astranaŭtaŭ raniej: «Jany pralaciać jak minimum na 5000 marskich mil (9200 km) dalej za Miesiac — heta našmat bolš, čym u luboj z papiarednich misij», — skazaŭ jon žurnalistam.
Chto ŭ ekipažy?
Hreh Ryd Uajzman (kamandzir misii) — amierykanski astranaŭt, udzielnik ekśpiedycyi na MKS u 2014 hodzie. Pavodle jaho, «Artemida-2» stanie krokam da žyćcia ludziej na Miesiacy i Marsie.
Viktar Hłovier (piłot) — pieršy afraamierykaniec, jaki adpravicca da Miesiaca. Jon raniej byŭ piłotam misii SpaceX Crew-1. Maje try mahistarskija stupieni.
Kryścina Kuk stanie pieršaj žančynaj, jakaja palacić da Miesiaca. Inžynierka, u 2019 hodzie praviała na MKS 328 dzion i ŭdzielničała ŭ pieršym žanočym vychadzie ŭ adkryty kosmas.
Džeremi Chansien — pieršy kanadziec, jaki adpravicca ŭ takuju dalokuju misiju. Byŭ piłotam-źniščalnikam i fizikam.
Što buduć rabić u palocie
Astranaŭty praviaduć manieŭry zbližeńnia z druhoj častkaj rakiety, kab adrepietavać budučyja stykoŭki. Taksama jany prymuć udzieł u navukovych ekśpierymientach — siarod inšaha buduć vyvučać upłyŭ radyjacyi i mikrahravitacyi.
Čakajecca, što misija adkryje šlach dla «Artemidy-3», u miežach jakoj narešcie płanujecca vysadka čałavieka na Miesiac. Ale ekśpierty ličać, što navat pry pośpiechu «Artemidy-2», vysadka ŭ 2027 hodzie małavierahodnaja, bo nieabchodny dla hetaha karabiel Starship ad SpaceX pakul nie dasiahnuŭ stabilnych palotaŭ.
Minhandlu vypadkova źliła dakumient, u jakim pakazała, jak i za što naličvaje premii10
Kamientary