«Baćka Juryja Dziamjanava nie vieryć u datyčnaść syna». Źjavilisia novyja padrabiaznaści spravy mańjaka-lifciora

Siarod ich — uspaminy paciarpiełych, padrabiaznaści ab rasśledavańni i hienietyčnaj ekśpiertyzie, a taksama reakcyja samoha Juryja i jaho baćki na zatrymańnie, piša Onliner.by.

Anatol u 1990‑ia straciŭ svaju adzinuju dačku — Naściu, jakoj tady tolki spoŭniłasia 12 hadoŭ. Voś jak jon uspaminaje tyja padziei:

— Usia škoła jaje chavała. Jak tolki dačku pachavali, na nastupny dzień, 18 krasavika, žonka sabrała małodšaje dzicia i paviezła ŭ Minsk da svaich baćkoŭ. Ja zastavacca adzin taksama nie chacieŭ i pajechaŭ da baćkoŭ u Viciebsk. Tak voś my raźjechalisia. Jana klikała mianie ŭ Minsk, ale ja skazaŭ: «Pakul nie znajdu zabojcu, nikudy nie pajedu». Usio žyćcio źmianiłasia.

Śviatłanie ź Viciebska ŭ 1999 hodzie było 16 hadoŭ — joj udałosia vyžyć paśla napadu. Jana ŭspaminała, što ŭ toj dzień vyjšła z padjezda sustrakać siabroŭku. Toj na vulicy nie akazałasia, i dziaŭčyna viarnułasia ŭ padjezd. Ź joj u lift zajšoŭ mužčyna i tam pačaŭ źbivać, dalej biŭ jaje na leśvičnaj kletcy i sprabavaŭ zadušyć. Śviatłana supraciŭlałasia, ale vyratavała jaje toje, što ŭ padjezd vyjšaŭ susied z aŭčarkaj. Jon spałochaŭ napadnika i pasprabavaŭ jaho dahnać. U siužecie paviedamlajecca, što dalej napady spynilisia, tamu što hvałtaŭnik spałochaŭsia vykryćcia.

Taksama paviedamlajecca, što DNK-ekśpiertyzu jašče ŭ 1996 hodzie zamovili ŭ Hiermanii.

— Jany praviali daśledavańni i atrymali źmiešanyja hienatypy pa troch epizodach. I z ulikam hienatypaŭ paciarpiełych byŭ sintezavany hienatyp padazravanaha. Ale ŭ 1996 hodzie ŭ nas jašče nie było bazy DNK, — patłumačyła Volha Drazdoŭskaja, namieśnik načalnika hałoŭnaha ŭpraŭleńnia sudova-miedycynskich ekśpiertyz DKSE.

Adznačajecca, što za ŭvieś čas rasśledavańnia pravieryli kala 100 tysiač padazravanych. 

Na Juryja Dziamjanava vyjšli ŭ kancy minułaha hoda, kali praanalizavali jaho ład žyćcia, mahčymaść pieramiaščeńnia, padabienstva pa prykmietach na toj čas. Tady pravieryli jaho bijałahičnyja ŭzory i na nastupny dzień paśla atrymańnia supadzieńnia zatrymali.

— Jon byŭ vielmi ździŭleny, u chodzie dopytu sprabavaŭ pakazać abureńnie, što zatrymańnie nie abhruntavana, jon ni pry čym. Pry hetym śledčyja zaŭvažyli, što jon prajaŭlaje cikaŭnaść i sprabuje vyśvietlić, jakija dokazy jość. Heta dadało ŭpeŭnienaści, što my idziem u viernym kirunku, — raspavioŭ Alaksandr Ahafonaŭ, načalnik hałoŭnaha śledčaha ŭpraŭleńnia SK.

Pavodle jaho słoŭ, baćka Juryja Dziamjanava nie vieryć u dačynieńnie syna da hetych złačynstvaŭ:

— Jon da ciapierašniaha času piša skarhi na supracoŭnikaŭ pravaachoŭnych orhanaŭ. Heta pažyły čałaviek, jaki nie ŭ poŭnym abjomie raźbirajecca, što takoje hienietyčnaja ekśpiertyza, jakija jaje vyniki, jakaja vierahodnaść supadzieńnia i što heta adnaznačnaje ŭstanaŭleńnie asoby, čyje bijałahičnyja ŭzory znojdzieny na miescy złačynstva.

Alaksandr Ahafonaŭ taksama adznačyŭ, što paśla pres-kanfierencyi pastupiła bolš za 16 zajaŭ, jakija treba pravieryć. Na dadzieny momant Juryju Dziamjanavu inkryminujecca vosiem zabojstvaŭ, dva zamachi na zabojstva, spałučanyja sa zhvałtavańniem, čatyry napady.

• 1
• 0
• 1
• 2
• 1
• 0
• 0
• 0