U Łojevie pradajuć budynak, u jakim mieścicca adzinaja pošta. A što budzie ź joj samoj?
Na elektronnyja tarhi vystaŭleny kompleks budynkaŭ u centry Łojeva, jaki naležyć RUP «Biełpošta». Mienavita tut znachodzicca adzinaje ŭ rajcentry paštovaje adździaleńnie. Taki vypadak zaŭvažany ŭpieršyniu, piša «Fłahštok».
Za vialiki kapitalny čatyrochpaviarchovy budynak ahulnaj płoščaj bolš za 1,5 tysiačy kvadratnych mietraŭ «Biełpošta» choča atrymać minimum 691 tysiač rubloŭ (amal 232 tysiač dalaraŭ). Aŭkcyjon pavinieni adbycca 11 listapada na placoŭcy Kamiteta dziaržaŭnaj majomaści Homielskaha abłvykankama.
«Fłahštok» datelefanavaŭsia ŭ abłasnoje adździaleńnie pradpryjemstva i spytaŭ ad imia miascovaha žychara, z čym źviazany prodaž budynka i dzie ŭ dalejšym buduć absłuhoŭvać žycharoŭ rajcentra.
Śpiecyjalistka paćvierdziła sam fakt i adkazała, što ŭ vypadku prodažu budynka «Biełpošta» maje namier arandavać pamiaškańni pad svoj ofis u tym ža samym budynku ŭ novaha ŭładalnika. A kali nie atrymajecca — to šukać dla paštovaha adździaleńnia novaje miesca pad arendu.
Pryčynaj prodažu nazvali toje, što «nam nie treba taki vialiki budynak». Z nahody ž mahčymaha pierajezdu paštovaha adździaleńnia zaklikali nie chvalavacca i adznačyli, što «pakul navat niama achvotnych» kupić budynak.
Kamientary