«Heta budzie najbolšy abaronny kantrakt u historyi Šviecyi» — Ukraina i Šviecyja damovilisia pra kuplu da 150 źniščalnikaŭ Gripen.
Premjer-ministr Šviecyi Ulf Krystersan i prezident Ukrainy Uładzimir Zialenski padpisali list ab namierach, jaki adkryvaje šlach da maštabnaj ekspartnaj ździełki pa prodažy šviedskich źniščalnikaŭ Gripen.
Premjer Šviecyi Ulf Krystersan adznačyŭ, što havorka pra pastaŭku 120—150 samalotaŭ, jakija składuć asnovu ŭkrainskaj avijacyi. Praces ich pastaŭki budzie pastupovym i zojmie 10—15 hadoŭ.
Ulf Krystersan nazvaŭ padpisańnie «pačatkam doŭhaha šlachu», jaki nabližaje Šviecyju i vytvorcu Saab da bujnoha kantrakta. Jon padkreśliŭ, što pahadnieńnie aryjentavana na doŭhaterminovaje supracoŭnictva i dazvolić Ukrainie pabudavać «vielmi surjoznyja pavietranyja siły».
Choć kankretnyja terminy pastavak pakul nie paznačany, Zialenski adznačyŭ, što Ukraina ŭžo rychtavała i praciahvaje rychtavać piłotaŭ dla Gripen. Pavodle jaho słoŭ, nastupny hod pavinien stać pačatkam vykarystańnia hetych samalotaŭ.
Prezident Ukrainy nazvaŭ źniščalniki «vielmi kłasnymi», što dazvalajuć vykonvać vialiki śpiektr zadač, i padkreśliŭ, što pahadnieńnie adkryvaje «novuju i vielmi źmiastoŭnuju staronku» ŭ adnosinach dźviuch krain.
«Heta budzie najbolšy abaronny kantrakt u historyi Šviecyi», — skazaŭ Krystersan.
Kamientary