Łukašenka źmianiŭ miežy Baranavičaŭ — zabraŭ 100 ha ŭ viadomaha Parka žyvioł
Alaksandr Łukašenka padpisaŭ ukaz ab źmienie miežaŭ Baranavičaŭ. Zhodna z dakumientam, sa składu horada vyklučyli 100 hiektaraŭ ziamli, jakija naležać Zaałandšaftnamu parku, i pieradali ich u padparadkavańnie Baranavickamu rajonu. Imavierna, sprava ŭ vajskovym aeradromie, što znachodzicca pobač.
Hetyja ziemli byli ŭklučany ŭ skład horada tolki ŭ 2023 hodzie, pryčym tady taksama tłumačyłasia rašeńnie «realizacyjaj hienieralnaha płanu horada». Ciapierašniaje vyklučeńnie z horada abhruntavana anałahičnymi farmuloŭkami pra «kompleksnaje raźvićcio».
Fiermierskaj haspadarcy «Zaałandšaftny park» naležyć viadomy Park žyvioł, kudy adpačyć i pahladzieć na pryrodu pryjazdžajuć hości sa ŭsioj krainy.
Pieradadzieny ziamielny ŭčastak znachodzicca niepasredna kala vajskovaj avijabazy ŭ Baranavičach. Niekatoryja ŭčastki navat prymykajuć da ŭźlotna-pasadačnaj pałasy dla źniščalnikaŭ, źviarnuła ŭvahu «Svaboda».
Vajskovy aeradrom u Baranavičach źjaŭlajecca adnoj z hałoŭnych avijabaz Biełarusi. Na jaho ŭzbrajeńni znachodzicca 61‑ia źniščalnaja avijabaza z samalotami MiH-29 i Su-30. U 2025 hodzie na bazu pastupili novyja źniščalniki Su- 30‑SM2 i ŭdarnyja viertaloty Mi-35M.
Z pačatku poŭnamaštabnaha ŭvarvańnia va Ukrainu aeradrom aktyŭna vykarystoŭvała rasijskaja armija dla vyletaŭ źniščalnikaŭ i raźmiaščeńnia samalotaŭ dalokaj radyjołakacyjnaj vyviedki A-50.
Z 2022 hoda na avijabazie iduć aktyŭnyja raboty: pabudavany abarončyja anhary, schoviščy dla paliva, adramantavana ŭźlotna-pasadačnaja pałasa.
Kamientary
Abo niejkija inšyja pryčyny, źviazanyja z padparadkavańniem horadu abo rajonu. Takija źmieny pieryjadyčna adbyvajucca i ź miažoj Minska.