U vioscy Akolica pry novaj carkvie chočuć pastavić vialiki pakłonny kryž z «Niaviestaj Nieniaviestnaj», jaki budzie bačny z MKAD-2 i źziać unačy. A pad im — muziej kryžoŭ pad adkrytym niebam.
Pakul katalickaja hramada damahajecca viartańnia nieahatyčnaha kaścioła ŭ vioscy Akolica, dzie ciapier raźmiaščajecca filijał Mastackaha muzieja, pravasłaŭnaja pabudavała pierad kaściołam carkvu i płanuje pastavić vialiki pakłonny kryž, jaki budzie bačny z MKAD-2 i źziać unačy.
Prajekt pakłonnaha kryža pobač z carkvoj abraza Maci Božaj «Mlekakarmicielka» byŭ pradstaŭleny na XXII Respublikanskim konkursie na najlepšy architekturny prajekt i pabudovu.
Pavodle jaho, na krutym malaŭničym schile za carkvoj pastaviać vialiki mietaličny kryž «Niaviesta Nieniaviestnaja», jaki budzie dobra bačny z MKAD-2, jakaja prachodzić praź viosku.
Rukavy kryža, čyja vyšynia budzie dasiahać 9 mietraŭ, buduć vykanany ź sietkavych abałonak sa stalnych stryžniaŭ. Jany buduć pašyracca da kancoŭ, a ŭ siarodkryžžy budzie ŭstaŭleny vitražny abraz «Niaviesta Nieniaviestnaja» ŭ pazałočanym abramleńni. Unutry abałonki budzie jašče adzin, šaścikancovy pravasłaŭny kryž, jaki budzie źziać nočču.
Terytoryja vakoł budzie ŭparadkavanaja i zabrukavanaja hranitam.
Ad padnožža kryža ŭniz, u bok darohi, płanujuć pastavić schody, na placoŭkach jakoj raźmiaścić muziej pad adkrytym niebam — kryžy roznych formaŭ i typaŭ.
Ciurkskaja (6—8 stst.) i kipčakskaja (11 st.) kamiennyja baby. Fota: Vialikaja rasijskaja encykłapiedyja
Adkul ich źbirajucca ŭziać, nie paviedamlajecca, adnak na vizualizacyjach možna zaŭvažyć i ciurkskuju kamiennuju babu VI—VIII stahodździaŭ z vyjavaj vusataha vajara z čaraju ŭ ruce, jakaja nijak nie źviazanaja z chryścijanstvam — takich bab stavili ŭ Ciurkskim kahanacie.
Mahčyma, heta prosta humarystyčnaja «paschałka», pakinutaja architektarami dla ŭvažlivych hledačoŭ.
Sama miascovaść — akolica Chalaŭščyna, jakaja za savieckim časam stała prosta Akolicaj — maje składanuju kanfiesijnuju historyju. Pieršapačatkova tut stajaŭ unijacki, a paźniej katalicki Chalaŭščynski kaścioł, źviazany z cudatvornym abrazom Maci Božaj Karmicielki (Lactasti Sacro Ubere). Paśla zdušeńnia paŭstańnia 1863 hoda novaŭźviedzieny muravany kaścioł u psieŭdahatyčnym styli pierarabili ŭ pravasłaŭnuju carkvu.
Paśla sama miascovaść atrymała štučnuju nazvu Kryžahorsk, a Chalaŭščynskaja carkva stała Kryžahorskaj, kab ścierci napamin pra katalicki šlachiecki rod Chalevaŭ.
Chram byŭ ledź nie źniščany pry budaŭnictvie spartkompleksu «Raŭbičy», ale ŭ vyniku ŭ im raźmiaścili Muziej biełaruskaha narodnaha mastactva, filijał Nacyjanalnaha mastackaha muzieja, jaki znachodzicca tut i dahetul.
Niešmatlikaja katalickaja hramada biezvynikova damahajecca viartańnia budynka kaścioła Śviatoha Maćvieja viernikam. Choć muravany chram bolšuju častku svajho isnavańnia, volaj rasijskich uładaŭ, byŭ pravasłaŭnym, miascovy prychod na jaho bolš, zdajecca, nie pretenduje.
U 2017—2022 hadach na ŭzhorku, pry darozie, što viadzie da histaryčnaha chrama była pabudavanaja novaja muravanaja pravasłaŭnaja carkva abraza Maci Božaj «Mlekakarmicielka», vykananaja ŭ niezvyčajnym styli, dzie spałučajucca formy pskoŭskaj škoły dojlidstva i sučasny dyzajn. U lipieni 2025 hoda jaje aśviaciŭ mitrapalit Vienijamin.
«Naša Niva» — bastyjon biełaruščyny
PADTRYMAĆHałoŭnuju architekturnuju ŭznaharodu Biełarusi atrymaŭ prajekt źniščeńnia histaryčnych kazarmaŭ u Hrodnie. Chto jašče adznačany? ŠMAT FOTA
U Minsku pabudujuć carkvu ŭ hruzinskim styli. Jaje architektar prajektuje chramy na akupavanych terytoryjach Ukrainy
Va Uruččy vysiekuć skvier pad pravasłaŭnuju carkvu. Natchnialisia rańniechryścijanskaj architekturaj Ryma
Rodnym bratam staražytnaj carkvy Navahrudka niečakana akazaŭsia chram z uźbiarežža Estonii — ale nievypadkova
U Akolicy pad Minskam adšukali mahiłu nastaŭnika Janki Kupały
Kamientary