«Adnaŭlajcie siamju». Rasijski apazicyjanier pryjšoŭ z paradami da Cichanoŭskaj — u internecie jaho asadzili
«Adździrajcie zad «kiraŭnika» ad kamfortnaha kresła i navodźcie paradak u ofisie».
Učora Siarhiej Cichanoŭski publična aburyŭsia, što nie zmoh prysutničać na ŭručeńni premii Mahnickaha ŭ Łondanie (jaje prysudzili jamu i Cichanoŭskaj), bo nie paśpieŭ zrabić brytanskuju vizu. Jon abvinavaciŭ u hetym Ofis Cichanoŭskaj, jaki nie papiaredziŭ jaho ab premii zahadzia. U Ofisie na heta adkazali, što papiaredžvali i vizu navat apłacili, ale Cichanoŭski nie dajechaŭ zdać adbitki palcaŭ.
Na hety kanflikt źviarnuŭ uvahu rasijski apazicyjanier Uładzimir Asiečkin, zasnavalnik prajekta Gulagu.net.
Jon napisaŭ adkryty list da Śviatłany Cichanoŭskaj.
«Kali łaska, spynicie hetyja intryhi ŭ vašym ofisie i skončycie hetuju idyjockuju kamiedyju. Vy atrymali reśpiekt i našu ŭsieahulnuju padtrymku vyklučna dziakujučy situacyi, u jakoj (na vialiki žal!) apynuŭsia vaš (!) muž Siarhiej. I vas padtrymali jak žonku adnaho ź lidaraŭ pratestu (bieź jaho ŭ turmie z punktu hledžańnia vialikaj palityki vy byli b no name). Toje, što adbyvałasia apošnija hady, usio čaściej prymušała mnohich zadumacca. Toje, što my čytajem zaraz, paćviardžaje našy aściarohi.
Heta podła i niepryhoža. Adździrajcie, kali łaska, zad «kiraŭnika» ad kamfortnaha kresła i navodźcie paradak u ofisie, i adnaŭlajcie, kali łaska, siamju. Nie pazbaŭlajcie sensu ŭsio toje, što zroblena dla vas i ŭ vašu padtrymku. Razbureńnie siamji i padobnaja «praca» (chutčej, sabataž) ofisa vas abnulajuć palityčna i praz 2 hady (kali tak pojdzie, to značna raniej) vy heta sami zrazumiejecie, ale budzie pozna.
Miru i dabra vam i vašaj krainie!» — apublikavaŭ zvarot u fejsbuku Asiečkin.
Jon vykazaŭ pavahu Siarhieju Cichanoŭskamu i inšym palityčnym viaźniam.
U kamientarach biełarusy rezka adkazali Asiečkinu.
«Zajmiciesia svaimi spravami», — pišuć.
«Navalnuju svaju vučycie boršč varyć».
«Jak by vam heta padypłamatyčniej rastłumačyć, što vas, rasiejcaŭ, našy biełaruskija spravy naohuł ja*ać nie pavinny? U siabie raźbiaryciesia».
«O, jak ža dobra što jość starejšy bracik, jaki raskaža nam niebarakam jak treba spravy rabić, dziakuj i nizki pakłon».
«Vaša rasijskaja apazicyjnaja pamyjka mała adroźnivajecca ad rasijskaj ža ŭłady — sračy, intryhi, až da zamachaŭ adzin na adnaho i kradziažu adzin u adnaho ž.
Dla taho kab vykazacca kampietentna, treba chacia b sprabavać raźbiracca ŭ situacyi. A vy ŭ joj nie raźbirajeciesia absalutna. I što dla vas Biełaruś? U vašaj abmiežavanaj śviadomaści choć ruskich uładaroŭ, choć jaje čeladzi, Ukraina i Biełaruś — dzieci, jakija ŭciakli ad vas, jakich vy sprabujecie viarnuć. Na spravie ž, biełarusy vam nie dzieci, nie braty, i ŭžo navat nie siabry. I my byli b ščaślivyja, kali b nas padzialaŭ akijan. A lepš dva», — hnieŭna adkazaŭ režysior Mikałaj Chalezin.
Paradami da čužoj siamji aburylisia i niekatoryja rasiejcy.
«Ja nie asabliva ŭ kantekście ich historyi, ale vidavočna, što biez namahańniaŭ samoj Cichanoŭskaj naŭrad ci b imia Cichanoŭskaha hrymieła tak, jak ciapier. Tak, jana atrymała palityčnuju vahu ŭ tym liku dziakujučy padtrymcy jaho paplečnikaŭ, ale jana faktyčna pryśviaciła jamu svajo žyćcio, pakul jon siadzieŭ, a da pasadki žyła jaho intaresami. Jana jamu ničym nie abaviazanaja.
A tezisy pra «adnaŭleńnie siamji» i «razburyła siamju», miakka kažučy, aburalnyja i nie vytrymlivajuć nijakaj krytyki. Čysta vajby śviatoj inkvizicyi ŭ duchu «jeretyčka, viarnisia va ŭłońnie carkvy, a nie toje budzieš spalenaja», — napisała žančyna z Rasii.
Kamientary