U Litvie zatrymali jašče troch čałaviek, źviazanych z kantrabandaj z dapamohaj pavietranych šaroŭ ź Biełarusi
Raniej u listapadzie za kantrabandu zatrymali jašče piacioch.
Supracoŭniki litoŭskaj Słužby achovy dziaržaŭnaj miažy zatrymali ŭ roznych miescach Salečnickaha rajona jašče troch čałaviek, padazravanych u dačynieńni da kantrabandy tavaraŭ, jakija dastaŭlalisia ź Biełarusi na pavietranych šarach, paviedamlaje LRT.
«U damach troch asob byli praviedzienyja pieratrusy, jany zatrymanyja i ŭziatyja pad vartu. U piatnicu prakuror chadajničaŭ pierad sudom ab abrańni ŭ dačynieńni da hetych asob samaj strohaj miery strymańnia — zatrymańnia terminam na 1 miesiac», — havorycca ŭ zajavie pamiežnaj pres-słužby.
U dakumiencie padkreślivajecca, što hetaje zatrymańnie — praciah apieracyi Słužby achovy dziaržaŭnaj miažy, praviedzienaj u pačatku listapada. Tady ŭ Varanskim rajonie pamiežniki zatrymali aŭtamabili Audi A6 i Škoda Octavia, jakija pieravozili biełaruskija cyharety. Byli zatrymanyja piać čałaviek. Miarkujecca, što ŭsie jany dziejničali ŭ składzie arhanizavanaj hrupy.
Pa fakcie niezakonnaj realizacyi akcyznych tavaraŭ i kantrabandy viadziecca dasudovaje rasśledavańnie, jakim kiruje Kaŭnaskaja akruhovaja prakuratura. Hetaja złačynnaja dziejnaść ciahnie za saboj štraf abo pazbaŭleńnie voli terminam da šaści hadoŭ.
U hetym hodzie pamiežniki ŭ Litvie zatrymali ŭžo 107 čałaviek, padazravanych u dačynieńni da kantrabandy, jakaja ažyćciaŭlajecca ź Biełarusi praz pavietra. U minułym hodzie ich było 46.
Sioleta na składy litoŭskich pamiežnikaŭ trapiła bolš za 1,3 miljona pačkaŭ kantrabandnych cyharet, jakija dastaŭlalisia ź Biełarusi na bieśpiłotnikach i pavietranych šarach. Usiaho ŭ hetym hodzie supracoŭniki Słužby achovy dziaržaŭnaj miažy ŭžo zatrymali 4 miljony pačkaŭ nielehalnych cyharet.
U kastryčniku na terytoryju Litvy niekalki razoŭ zalatali mietearałahičnyja zondy z kantrabandaj ź Biełarusi. Ich paloty nieadnarazova parušali rabotu litoŭskich aeraportaŭ.
U adkaz na heta Litva zakryła miažu ź Biełaruśsiu da 30 listapada.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ1414
Kamientary