Syn try hady vydavaŭ siabie za pamierłuju maci, kab atrymlivać jaje piensiju
Žadańnie zachavać vysoki dachod padšturchnuła 56‑hadovaha italjanca da varjackaha ŭčynku. Try hady jon atrymlivaŭ piensiju za pamierłuju maci, chavajučy jaje cieła doma, ale pahareŭ na sprobie abnavić jaje paśviedčańnie asoby. Kab prajści praceduru, machlar źjaviŭsia da čynoŭnikaŭ u vobrazie maci — z makijažam i ŭ žanočaj sukiency.
U paŭnočnaj Italii palicyja rasśleduje dziŭnuju historyju machlarstva ź piensijaj, jakaja adnačasova vyhladaje i jak bytavaja drama, i jak kryminalny tryler. Jak paviedamlaje Corriere della Sera, usio pačałosia kala troch hadoŭ tamu, kali pamierła 82‑hadovaja Hracyjeła Dal'Oljo (Graziella Dall'Oglio).
Jaje syn, jakomu na toj momant było 53 hady, vyrašyŭ nie paviedamlać uładam pra śmierć. Zamiest arhanizacyi pachavańnia jon zaharnuŭ cieła maci ŭ praściny i spalny miašok, schavaŭšy jaho ŭ adnym z padsobnych pamiaškańniaŭ ułasnaha doma.
Na praciahu nastupnych hadoŭ mužčyna vioŭ złačynnaje padvojnaje žyćcio. Pakul cieła žančyny pastupova mumifikavałasia ŭ domie, syn praciahvaŭ karystacca jaje finansami. Staŭkaj byli vialikija hrošy: hadavy dachod składaŭ kala 53 000 jeŭra. Siudy ŭvachodziła salidnaja piensija pa stracie karmiciela (baćka afierysta byŭ lekaram), a taksama prybytak ad zdačy ŭ arendu siamiejnaj nieruchomaści. Kab u padatkovaj nie ŭźnikała pytańniaŭ, syn štohod spraŭna zapaŭniaŭ dekłaracyi i padrablaŭ podpis niabožčycy.
Schiema pracavała biezdakorna da taho momantu, pakul nie skončyŭsia termin dziejańnia paśviedčańnia asoby žančyny. Kab praciahvać atrymlivać vypłaty, nieabchodna było abnavić dakumienty, što patrabavała asabistaj prysutnaści ŭładalnicy.
Mužčyna advažyŭsia na ryzykoŭny śpiektakl. Jon padstryh vałasy pad styl maci, nanios tanalny krem, pamadu i łak dla paznohciaŭ. Vobraz dapaŭniali žamčužnyja karali, staramodnyja zavušnicy i doŭhaja spadnica. U takim vyhladzie jon pryjšoŭ u dziaržustanovu ŭ pryharadzie Borha-Virdžylia.
Adnak maskarad nie ŭdaŭsia. Supracoŭnikaŭ naściarožyli fizičnyja asablivaści «naviedvalnicy»: zanadta mahutnaja šyja, dziŭny tembr hołasu, jaki zryvaŭsia na bas, i ruki, skura na jakich zusim nie adpaviadała 85‑hadovamu ŭzrostu. Čynoŭniki źviarnulisia ŭ palicyju. Kali pravaachoŭniki paraŭnali hościa z archiŭnymi fota sapraŭdnaj Dal'Oljo, padman staŭ vidavočnym.
Padčas pieratrusu ŭ domie padazravanaha palicyja znajšła schavanaje mumifikavanaje cieła maci. Ciapier mužčyna znachodzicca pad śledstvam za machlarstva i niezakonnaje ŭtojvańnie cieła.
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ3
Kamientary