Biełarusu nie dali nielehalna ŭvieźci ŭ Polšču akamianiełaści paŭmiljardnaha ŭzrostu
Na miažy z Polščaj pravierka aŭtamabila Mercedes, jaki vyjazdžaŭ ź Biełarusi, skončyłasia niečakanaj znachodkaj. Polskija mytniki ŭ Terespali znajšli pad siadzieńniami, u kišeniach dźviarej i navat u sumcy dla dakumientaŭ cełuju kalekcyju staražytnych istot — tryłabity, zuby staražytnych akuł i akamianiełaści edyjakarskaj faŭny.
Staranna ahledzieŭšy aŭtamabil, supracoŭniki mytni ŭsiaho naličyli 24 akamianiełaści. Biełaruski kiroŭca ničoha na miažy nie dekłaravaŭ, śćviardžajučy, što kupiŭ usie hetyja rečy ŭ bresckaj kramie i chacieŭ padaravać ich znajomym.
Kalekcyju pieradali ŭ Dziaržaŭny hieałahičny instytut Polščy. Ekśpierty vyznačyli, što heta nie suvieniry, a abjekty, jakija padlahajuć achovie. Unutry naboru — vosiem tryłabitaŭ, adzinaccać zuboŭ staražytnych akuł i čatyry akamianiełaści edyjakarskaj faŭny.
Edyjakarskija arhanizmy źjaŭlajucca adnymi z najstaražytniejšych na Ziamli. Znojdzienyja ŭzory naležać da tak zvanaha ansambla akamianiełaściaŭ Biełaha mora ŭzrostam 558—555 miljonaŭ hadoŭ. Jany pachodziać z terytoryi ciapierašniaj rasijskaj Archanhielskaj vobłaści.
Pavodle acenki śpiecyjalistaŭ, košt hetaj kalekcyi pieravyšaje 27 tysiač złotych (kala 7830 dalaraŭ). Ciapier biełarus fihuruje ŭ spravie ab sprobie kantrabandy achoŭnych pryrodnych abjektaŭ.
Ciapier čytajuć
17‑hadovy chłopiec žyvie ŭ padvale. Jon zaharnuŭsia ŭ čyrvona-zialony ściah, kab Łukašenka źviarnuŭ na jaho ŭvahu19
Kamientary