Karal Naŭrocki admianiŭ sustreču z Orbanam z-za jaho vizitu ŭ Maskvu
Prezident Polščy Karal Naŭrocki 3 śniežnia adpraŭlajecca ŭ vizitam u Vienhryju, ale jon admoviŭsia ad zapłanavanaj sustrečy z premjer-ministram Vienhryi Viktaram Orbanam.
Kiraŭnik upraŭleńnia mižnarodnaj palityki kancylaryi prezidenta Polščy Marcin Pšydač paviedamiŭ, što Naŭrocki vyrašyŭ «abmiežavać prahramu svajho vizitu ŭ Vienhryju vyklučna samitam prezidentaŭ krain Vyšahradskaj hrupy ŭ Esterhamie». «Takoje rašeńnie pryniata ŭ suviazi ź niadaŭnim vizitam premjer-ministra Vienhryi Viktara Orbana ŭ Maskvu i jaho kantekstam», — prostym tekstam paviedamlaje polski bok.
Dvuchdzionny vizit Karala Naŭrockaha ŭ Vienhryju pačynajecca 3 śniežnia. Jaho sustreča z Orbanam pavinna była adbycca ŭ Budapiešcie.
Viktar Orban naviedaŭ Maskvu 28 listapada 2025 hoda. Jon zajaŭlaŭ, što asnoŭnaj temaj pieramoŭ z Uładzimiram Pucinym buduć pastaŭki enierhanośbitaŭ, bo Vienhryja praciahvaje ich impart z Rasii. Na sustrečy ŭ Kramli Orban taksama zajaviŭ, što byŭ by «vielmi rady», kali b Budapiešt staŭ placoŭkaj dla sustrečy Pucina i Trampa.
Paśla vizitu jon zajaviŭ, što Ukraina pavinna stać «bufiernaj zonaj».
Admiena sustrečy z boku Polščy śviedčyć pra hłybokaje roznahałośsie pamiž Varšavaj i Budapieštam u dačynieńni da vajny va Ukrainie i adnosin z Kramlom.
Kamientary