Kali balać sustavy — doktar patłumačyŭ, što vy kožny dzień robicie nie tak

Chvaroby sustavaŭ upłyvajuć na jakaść žyćcia i mabilnaść, vyklikajučy bol i abmiežavańnie ŭ ruchach. Jany ŭvachodziać u top-10 pryčyn invalidnaści ludziej va ŭsim śviecie.

Samym raspaŭsiudžanym, pavodle danych Suśvietnaj arhanizacyi achovy zdaroŭja, źjaŭlajecca asteaartryt. Pavodle niekatorych acenak, ad jaho pakutuje bolš za 300 miljonaŭ čałaviek.

Z uzrostam ryzyka raźvićcia zachvorvańniaŭ sustavaŭ pavialičvajecca. Adnak heta nie aznačaje, što ŭsie abaviazkova sutyknucca z padobnymi prablemami. Važnyja pravilny ład žyćcia i svoječasovaje lačeńnie prajaŭlenych simptomaŭ.

Ab pryčynach, nastupstvach i prafiłaktycy Tochka.by raspavioŭ traŭmatołah-artapied miedycynskaha centra pa lačeńni bolu i reabilitacyi «NIEO» Siarhiej Paŭłovič.

Čamu ŭźnikajuć chvaroby sustavaŭ?

Surazmoŭca adznačyŭ, što da chvarob sustavaŭ pryvodzić tak šmat pryčyn, što ich možna vyłučyć u asobnyja hrupy.

Naprykład, niepasredna ŭzrostavyja źmieny pravakujuć dehienieratyŭnyja pracesy ŭ chrastkovaj tkancy i, jak vynik, znošvańnie sustavaŭ.

Istotnuju rolu adyhryvajuć traŭmy. Jany parušajuć strukturu sustava i paskarajuć jaho znos. Pierałomy, raściažeńni, udary mohuć stać tryhierami raźvićcia artrytu ci asteaartrytu.

Niemałavažnym faktaram u sučasnych umovach stanovicca niapravilny ład žyćcia, parušeńnie režymu charčavańnia i snu. Niedastatkovaja fizičnaja aktyŭnaść pryvodzić da słabaści ciahlic, jakija zaklikany stabilizavać sustavy, a praźmiernyja nahruzki ci pamyłkovaja technika zaniatkaŭ sportam — da paškodžańniaŭ.

Jašče adzin aśpiekt — zapalenčyja pracesy. Infiekcyi (naprykład, vienieryčnyja albo virusnyja zachvorvańni) ci aŭtaimunnyja reakcyi mohuć vyklikać zapaleńnie ŭnutry sustava.

Taksama nielha nie ŭličvać chraničny stres i najaŭnaść spadarožnych zachvorvańniaŭ, takich jak cukrovy dyjabiet ci atłuścieńnie.

Važnaje značeńnie ŭ mnohich aśpiektach, źviazanych sa zdaroŭjem, maje spadčynnaść. Kali ŭ siamji jość vypadki zachvorvańniaŭ sustavaŭ, ryzyka ich prajaŭleńnia ŭ nastupnych pakaleńniaŭ pavyšajecca.

Adnak hieny — nie prysud. Možna źnizić vierahodnaść raźvićcia prablem za košt rańniaj dyjahnostyki i pravilnaj prafiłaktyki.

Simptomy chvarob sustavaŭ

Pavodle słoŭ Siarhieja Paŭłoviča, pieršyja prykmiety prablem z sustavami prajaŭlajucca pa-roznamu i na rańniaj stadyi byvajuć nieprykmietnymi ci ŭsprymajucca jak časovyja niedamahańni.

«Samy vidavočny simptom — bol, jaki moža źjaŭlacca pry ruchu, nahruzkach ci navat u spakoi. Takoje adčuvańnie časta tłumačycca zapalenčymi pracesami, źmienami chrastkovaj tkanki, kapsulna-źviazačnaha aparata taho ci inšaha sustava. Boli mohuć adroźnivacca pa charaktary: ad tupych da vostrych prystupapadobnych, što zaležyć ad kankretnaj patałohii i stadyi zachvorvańnia», — tłumačyć ekśpiert.

Jašče adna važnaja prykmieta — abmiežavańnie ruchomaści. Kali sustavy pačynajuć zapalacca, uźnikaje pačućcio skavanaści, asabliva paśla doŭhaha adpačynku abo ranicaj (tak zvany ranišni zastoj).

U dalejšym heta adčuvańnie moža pryvieści da źmianšeńnia amplitudy ruchaŭ, što zdolna značna źnizić mahčymaść vykanańnia zvyčajnych paŭsiadzionnych zadač.

Pakazčyk zapalenčaha pracesu ŭ sustavach — aciočnaść. Jana, jak praviła, uźnikaje z-za zališniaha nazapašvańnia ŭnutrysustaŭnaj vadkaści i stanovicca śledstvam patałohii ŭ sustavie.

Pra zapaleńnie i nieabchodnaść terminova źviarnucca da śpiecyjalista kažuć taksama źmieny na skury: pačyrvanieńnie i pavyšeńnie tempieratury ŭ rajonie prablemnaj zony.

Niekatoryja pacyjenty adznačajuć źmianieńnie formy abo defarmacyju sustava, źjaŭleńnie vuzłoŭ ci asimietryi. Heta śviedčańnie doŭhaha prahresavańnia patałahičnaha pracesu. Naprykład, pry asteaartrycie ci reŭmatoidnym artrycie.

Dadatkovymi simptomami mohuć być ahulnaja słabaść, chutkaja stamlalnaść i navat pavyšeńnie tempieratury cieła, što charakterna dla sistemnych zapalenčych zachvorvańniaŭ, takich jak reŭmatoidny artryt ci sasudzistyja patałohii.

«Važna pamiatać, što ŭžo pieršyja prykmiety — časovy bol, skavanaść ci lohkaje zapaleńnie — patrabujuć uvažlivaha staŭleńnia i kansultacyi doktara. Čym raniej pačać lačeńnie, tym bolš šancaŭ praduchilić značnyja paškodžańni sustavaŭ i zachavać ich funkcyju na doŭhija hady», — padkreślivaje surazmoŭca.

Nakolki prablema aktualnaja dla Biełarusi?

Pavodle danych Ministerstva achovy zdaroŭja, za apošnija hady zachvorvańnie asteaartrytam i poliartrytam u našaj krainie znachodzicca na ŭzroŭni 7‑10 vypadkaŭ na 1000 čałaviek.

Štohod u respublicy rehistrujuć ad 100 da 200 tysiač pacyjentaŭ z dyjahnastavanymi zachvorvańniami sustavaŭ. Va ŭzrostavaj hrupie 60+ dola pacyjentaŭ składaje kala 30-40%.

Ahulnaja statystyka pakazvaje rost kolkaści ludziej z asteaartrytam, reŭmatoidnym artrytam i inšymi patałahičnymi stanami.

Adkazvajučy na pytańnie žurnalista pra mahčymy ŭpłyŭ čarnobylskaj katastrofy na stan sustavaŭ, śpiecyjalist adznačyŭ, što vyznačyć naŭprostavuju suviaź składana.

«Viadoma, što radyjacyja i ekałahičnyja pryčyny mohuć niehatyŭna ŭździejničać na arhanizm, u tym liku na imunnuju sistemu i abmien rečyvaŭ, što patencyjalna ŭpłyvaje i na zdaroŭje sustavaŭ», — udakładniaje doktar.

Jakija sustavy znošvajucca chutčej?

Čaściej za ŭsio pakutujuć kalennyja, tazaściehnavyja, plečavyja, a taksama sustavy kiściaŭ i stop.

Jak patłumačyŭ artapied, kalennyja i tazaściehnavyja sustavy schilnyja da znosu z-za vosievaj nahruzki pry chadzie. Vielizarnuju rolu tut adyhryvajuć vaha cieła, najaŭnaść traŭm i charaktar pracy. Častymi pacyjentami stanoviacca prafiesijnyja spartsmieny.

Prablemy ŭ kiściach i stopach raźvivajucca pieravažna pry reŭmatoidnych artrytach i inšych zapalenčych zachvorvańniach.

Kali bol uźnikła ŭ adnym miescy, heta nie značyć, što jana abaviazkova prajavicca ŭ inšym. Adnak u niekatorych vypadkach, naprykład, pry reŭmatoidnym artrycie paražeńnie moža raspaŭsiudžvacca na niekalki sustavaŭ. U tym liku tamu važna vyjaŭlać i lačyć zachvorvańni svoječasova.

Ci zaŭsiody pry abśledavańni treba rabić MRT sustavaŭ?

Niekatoryja pacyjenty adciahvajuć vizit da doktara z-za niežadańnia prachodzić šerah pracedur. Daviedalisia ŭ surazmoŭcy, jak časta treba źviartacca da mahnitna-rezanansnaj tamahrafii.

Doktar zaŭvažyŭ, što MRT — vielmi infarmatyŭny mietad dyjahnostyki, asabliva pry źmienach na rańnich stadyjach, zapaleńniach abo paškodžańniach miakkich tkanak.

Adnak nie zaŭsiody treba śpiašacca jaho rabić. Časta dla vyjaŭleńnia prablemy dastatkova renthiena. Sučasnyja miedcentry majuć novaje abstalavańnie ź minimalnaj nahruzkaj apramianieńnia. Dla pacyjenta taki vid daśledavańnia bolš tanny i chutki, a dla vopytnaha doktara — dastatkova infarmatyŭny.

I renthien, i MRT zvyčajna pryznačajuć pavodle pakazańniaŭ: pry najaŭnaści simptomaŭ, paharšeńni stanu abo dla kantrolu efiektyŭnaści lačeńnia.

Častata praviadzieńnia daśledavańnia zaležyć ad situacyi: jak praviła, dastatkova adnaho-dvuch razoŭ na hod, kali jość pakazańni, abo pa rekamiendacyi doktara.

Kali apieracyja pa zamienie sustava niepaźbiežnaja?

Rašeńnie pra endapratezavańnie (jak kažuć pacyjenty, «zamienu sustava») zaležyć ad cełaha šerahu faktaraŭ: stupieni razbureńnia chrastka, bolevaha sindromu, abmiežavańnia ruchomaści i ahulnaha stanu.

Kali kansiervatyŭnaje lačeńnie nie daje vyniku, bol pieraškadžaje žyć i pracavać, a razbureńnie sustava dasiahnuła krytyčnaha punkta, to šala vahaŭ schilajecca ŭ bok chirurhičnaha ŭmiašańnia. Zvyčajna heta apošnija stadyi asteaartrytu, kali inšyja mietady ŭžo nieefiektyŭnyja.

Bolšaść pacyjentaŭ paśla zamieny sustava viartajucca da aktyŭnaha žyćcia, pracujuć i padarožničajuć.

Viadoma, jość abmiežavańni. Naprykład, supraćpakazanyja praźmiernyja fizičnyja nahruzki. Ale ŭ cełym endapratezavańnie i rekamiendacyi ŭrača pa reabilitacyi dazvalajuć dasiahnuć vysokaha ŭzroŭniu funkcyjanalnaści.

Jak papiaredzić prablemy i zaścierahčysia ad chvarob sustavaŭ?

Pavodle słoŭ surazmoŭcy, siońnia pry naležnaj rańniaj dyjahnostycy i vykanańni pratakołaŭ lačeńnia chvarobu možna trymać pad kantrolem i zachoŭvać jakaść žyćcia doŭhija hady.

Ale da vyrašeńnia prablemy treba padychodzić adkazna i kompleksna.

Naprykład, važna sačyć za vahoj. Zališniaja masa cieła stvaraje dadatkovuju nahruzku na kalennyja i tazaściehnavyja sustavy.

Nieabchodna vykonvać režym pracy i adpačynku, nie dapuskać pieratamleńnia. I pravilna charčavacca: svoječasova nasyčać arhanizm (i tkanki) ježaj, bahataj kalcyjem, vitaminam D, amieha-3 tłustymi kisłotami.

Minimizuje ŭron rehularnaja, ale ŭmieranaja fizičnaja aktyŭnaść. Heta mohuć być prahułki ci płavańnie.

Taksama važna nie zabyvać pra čekap — pieryjadyčnaje abśledavańnie ŭ doktara. Svoječasovy vizit pry pieršych simptomach, pravilnyja padychody da lačeńnia na rańniaj stadyi razam ź inšymi mierami dapamohuć paźbiehnuć surjoznych nastupstvaŭ i navat apieracyj.

• 0
• 0
• 0
• 0
• 0
• 0
• 0
• 0