U Ružanach archieołahi znajšli frahmienty padmurka budynka časoŭ Lva Sapiehi
Frahmienty staražytnaha padmurka, jaki moža naležać budynkam časoŭ Lva Sapiehi, byli znojdzieny ŭ haradskim pasiołku Ružany Pružanskaha rajona. Pra heta paviedamiła dyrektarka Ružanskaha pałacavaha kompleksu Alena Kubarka, piša BiełTA.
Padčas čarhovaha etapu restaŭracyi, źviazanaj z prakładkaj kamunikacyj da teatralnaha korpusa, rabočyja natrapili na staražytnuju muroŭku. Paśla ahladu archieołahi pryjšli da vysnovy, što vyjaŭlenyja frahmienty, vierahodna, źjaŭlajucca reštkami adnaho z budynkaŭ, jakija isnavali ŭ čas, kali majontkam vałodaŭ Leŭ Sapieha.
Zamak u Ružanach Sapieha pačaŭ budavać u 1602 hodzie. Pavodle histaryčnych źviestak, pobač ź im znachodzilisia try damy — vialiki, mały i siaredni. Znojdzieny padmurak moža naležać adnamu ź ich.
«Heta ŭnikalnaja znachodka, — adznačyła Alena Kubarka. — Raniej my dakładna nie viedali, dzie raźmiaščaŭsia siadzibny kompleks i jakija miežy jon mieŭ. Ciapier stanovicca jaśniej, nakolki vialikim byŭ majontak. Usio śviedčyć pra toje, što Ružany ŭ asnoŭnym znachodzilisia kala padnožža zamka».
Restaŭracyja Ružanskaha pałacavaha kompleksu viadziecca z 2008 hoda. Za hety čas byli adnoŭlenyja centralnaja ŭjaznaja brama, bakavyja flihieli, u jakich stvorany muziej, i paŭnočna-ŭschodniaja arkada. Zavieršanyja vonkavyja pracy pa restaŭracyi dvuchpaviarchovaha Uschodniaha (teatralnaha) korpusa. U budynku płanujecca raźmiaścić muziejnyja zały, fondaschovišča, a taksama hatel i kaviarniu.
Leŭ Sapieha (1557-1633) — adzin z najbolš vydatnych dziaržaŭnych dziejačaŭ Vialikaha Kniastva Litoŭskaha. Jon byŭ kancleram i vialikim hietmanam, adnym z samych bahatych i ŭpłyvovych mahnataŭ, a taksama viadomym miecenatam. Ź jaho imiem siarod inšaha źviazvajecca pryniaćcie treciaha Statuta VKŁ 1588 hoda — viaršyni pravavoj dumki hetaj dziaržavy.
U Navahrudku archieołahi znajšli ŭčastak padmurka XVIII stahodździa
Tysiačahadovyja fibuły znajšli ŭ Bresckaj vobłaści. Ich stvaryli vieniedy i hoty
Vyjšła kniha pra adzin z najvažniejšych skarbaŭ, znojdzienych u Biełarusi
Archieołah pakazała, jakoje charastvo znajšli sioleta na haradziščy Bancaraŭščyna
Kamientary