U ZŠA pačali źbirać pieršyja latajučyja aŭtamabili

Jak paviedamlaje Daily Mail, amierykanskaja kampanija Alef Aeronautics abviaściła pra pačatak vytvorčaści svajho futurystyčnaha prajekta — Model A Ultralight. Zborka mašyn pačałasia stroha pa hrafiku na zavodzie kampanii ŭ San-Matea (Kalifornija, ZŠA).

Kampanija adznačaje, što vyrab kožnaha aŭto budzie ździajśniacca ŭručnuju i zojmie niekalki miesiacaŭ. Pieršyja ekzemplary buduć pieradadzienyja tolki nievialikaj hrupie klijentaŭ dla testavańnia technałohii ŭ realnych umovach.

Uładalniki pavinny buduć prajści navučańnie (kampanija śćviardžaje, što navučycca kiravać aŭto možna za 15 chvilin) i vykonvać strohija patrabavańni biaśpieki. Atrymany dośvied dapamoža Alef Aeronautics naładzić pracesy pierad zapuskam masavaj aŭtamatyzavanaj vytvorčaści.

U adroźnieńnie ad aerataksi, jakim patrebnyja śpiecyjalnyja placoŭki, raspracoŭka Alef Aeronautics — heta sapraŭdny «latajučy aŭtamabil», jaki moža i jeździć pa zvyčajnych darohach, i viertykalna ŭźlatać u pavietra.

Pa ziamli jon jedzie jak zvyčajny elektrakar dziakujučy čatyrom kampaktnym ruchavikam u kožnym kole. Kabina kiroŭcy-piłota akružanaja schavanymi pad sietkavatym kuzavam prapielerami, jakija zabiaśpiečvajuć ciahu dla viertykalnaha ŭźlotu i palotu z chutkaściu da 177 kiłamietraŭ u hadzinu.

Pavialičyć

Kuzaŭ z vuhlarodnaha vałakna pamieram prykładna piać na dva mietry dazvalaje pavietru prachodzić praz aŭtamabil, adnačasova nadziejna zakryvajučy łopaści, jakija kruciacca.

Mašyna raźličanaja na dvuch čałaviek. Dalokaść chodu pa ziamli składaje kala 320 km, a ŭ pavietry — da 177 km.

Jak paviedamlajecca, madel Model A Ultralight, jakaja ciapier pajšła ŭ vytvorčaść — palehčanaja viersija pratatypa Model A. Kab atrymać dazvoł na ekspłuatacyju i zastacca ŭ katehoryi «zvyšlohkich» (vaha ŭsiaho 385 kh), inžynieram daviałosia pajści na kampramisy.

Jurydyčna mašyna kłasifikujecca jak «nizkachutkasny transpartny srodak» (pa anałohii z holf-karami). Heta značyć, što na darohach ahulnaha karystańnia jaje chutkaść prahramna abmiežavanaja da 40 km/h, chacia technična jana zdolnaja jechać chutčej. Adnak u pavietry hetyja abmiežavańni nie dziejničajuć.

Pavialičyć

Šlach da kanviejera zaniaŭ amal dziesiać hadoŭ. Raspracoŭka pačałasia ŭ 2015 hodzie, a pieršy pratatyp pakazali ŭ 2017-m. Prajekt pryciahnuŭ uvahu viadomaha inviestara Cima Drejpiera (jaki raniej padtrymaŭ Tesla i SpaceX), čyj fond ukłaŭ u startap 3 miljony dalaraŭ.

U 2023 hodzie Model A atrymała śpiecyjalny siertyfikat lotnaj prydatnaści ad Fiederalnaha ŭpraŭleńnia cyvilnaj avijacyi ZŠA (FAA).

Na siońnia kampanija sabrała ŭžo 3 500 papiarednich zamoŭ na ahulnuju sumu kala 1 miljarda dalaraŭ. Vytvorca spadziajecca, što ŭ budučyni, kali vytvorčaść stanie masavaj, košt latajučaha aŭtamabila źnizicca i nablizicca da cany zvyčajnaha aŭto (prykładna 35 000 dalaraŭ), što zrobić maru pra paloty dastupnaj dla kožnaha.

• 6
• 0
• 3
• 0
• 1
• 0
• 1
• 1