Alaksandr Łukašenka padčas vystupleńnia na UNS zajaviŭ, što rasijski balistyčny kompleks «Arešnik» znachodzicca na terytoryi Biełarusi «ŭžo z učarašniaha dnia».
Pa słovach Łukašenki, «Arešnik» užo prybyŭ u Biełaruś i pačaŭ nieści bajavoje dziažurstva.
«Stratehičnuju abaronu zabiaśpiečvaje i naša vajennaje supracoŭnictva, pierš za ŭsio z Rasijskaj Fiederacyjaj. Tamu Biełaruś i Rasija realizujuć kompleks mier stratehičnaha strymlivańnia — heta razhortvańnie na našaj terytoryi rasijskaha składnika rehijanalnaj hrupoŭki vojskaŭ.
U vypadku abvastreńnia kanfliktaŭ prapisanyja: Uzbrojenyja siły — niekalki dziasiatkaŭ tysiač čałaviek — na zachadzie Rasii, jakija nieadkładna druhim ešałonam uklučajucca ŭ vajennuju baraćbu. Pieršym idzie Biełaruś — nam treba reahavać. Dalej nas padtrymlivaje Rasijskaja Fiederacyja. Voś heta i jość rehijanalnaja hrupoŭka vojskaŭ.
I taktyčnuju jadziernuju zbroju, jakuju my viarnuli ŭ Biełaruś. Akramia taho, pieršyja pazicyi abstalavanyja rakietnym kompleksam «Arešnik»: jon u nas z učarašniaha dnia i zastupaje na bajavoje dziažurstva», — zajaviŭ jon.
U kancy kastryčnika Łukašenka ŭžo kazaŭ, što płanujecca pastavić «Arešnik» na bajavoje dziažurstva ŭ śniežni. Jon tłumačyŭ heta žadańniem prademanstravać zamiežnym apanientam, što Biełaruś maje mahčymaść nanieści ŭdar u vypadku paharšeńnia situacyi, i papiaredžvaŭ, kab «nie pravakavali». Jašče raniej, u kancy vieraśnia, hety kompleks nibyta byŭ «u darozie» da Biełarusi.
Rasijski balistyčny kompleks «Arešnik» — nośbit jadziernaj zbroi. Pavodle źviestak ukrainskaj raźviedki, heta nie aficyjnaja nazva ŭzbrajeńnia, a kodavaje abaznačeńnie navukova-daśledčaj raspracoŭki. Sama ž rakietnaja sistema nasamreč maje nazvu «Kiedr».
Upieršyniu rasijskija vojski ŭžyli hetu zbroju suprać Ukrainy na śvitanku 21 listapada 2024 hoda, kali byŭ naniesieny ŭdar pa Dniapry. Spačatku Pavietranyja siły USU, Centr stratehičnych kamunikacyj ukrainskaj armii i prezident Ukrainy Uładzimir Zialenski paviedamlali, što Rasija vykarystała mižkantynientalnuju balistyčnuju rakietu «Rubiež». Adnak užo ŭviečary taho ž dnia prezident Rasii Uładzimir Pucin zajaviŭ, što havorka išła pra rakietu siaredniaj dalokaści «Arešnik», a nie pra mižkantynientalnuju.
Pavodle acenak ukrainskich raźviedčykaŭ, pry ŭdary pa Dniapry hetaja rakieta była vykarystanaja ŭ varyjancie bieź jadziernaha bojezarada.
Kamientary