Ekanomika ZŠA demanstruje samy vysoki rost za apošnija dva hady

Spravazdača pakazała, što, niahledziačy na zapavoleńnie rostu rynku pracy i zaniepakojenaść inflacyjaj, spažyvieckija vydatki vyraśli na 3,5% u hadavym vyražeńni ŭ paraŭnańni z 2,5% u papiarednim kvartale.

Na praciahu 2025 hoda ekanomika Złučanych Štataŭ adčuvała surjozny cisk z-za ŭviedzienych Donaldam Trampam kardynalnych źmien u handlovaj i mihracyjnaj palitycy, a taksama ŭrazańnia biudžetnych vydatkaŭ.

I choć heta pryviało da rezkich vahańniaŭ u niekatorych halinach, takich jak impart i ekspart, u cełym ekanomika, nasupierak prahnozam, zachavała ŭstojlivuju dynamiku.

Abvieščanyja pakazčyki akazalisia značna vyšej čakanych, pry tym, što bolšaść analitykaŭ prahnazavali hadavy temp rostu na ŭzroŭni kala 3,2%.

Na dumku analitykaŭ, rost spažyvieckich vydatkaŭ u trecim kvartale hoda byŭ abumoŭleny pavieličeńniem vydatkaŭ na miedycynskija pasłuhi.

Impart, jaki pamianšaje ahulny pakazčyk rostu, praciahvaŭ źnižacca z-za ŭviedzienych prezidentam Trampam pošlin na pastaŭki ŭ ZŠA.

U toj čas jak ekspart, jaki raniej rezka ŭpaŭ, adnaviŭsia, pavialičyŭšysia na 7,4%. Dziaržaŭnyja vydatki taksama vyraśli, dziakujučy tratam na abaronu.

Hetyja pośpiechi dapamahli pieraadoleć spad inviestycyj, u tym liku ŭ intelektualnuju ŭłasnaść, a taksama prablemy na rynku žylla. Jon pa-raniejšamu pakutuje ad vysokich pracentnych stavak, jakija pahoršyli prablemy z dastupnaściu žylla i deficytam prapanovy.

Pa słovach Majkła Pirsa, hałoŭnaha ekanamista Oxford Economics pa ZŠA, ekanomika krainy dobra padrychtavana da 2026 hoda, pakolki pačynaje adčuvać efiekt ad źnižeńnia padatkaŭ i niadaŭnich mier centralnaha banka ZŠA pa źnižeńni pracentnych stavak.

«Asnoŭnyja pakazčyki śviedčać pra stabilny rost», — skazaŭ jon.

Adnak analityki papiaredzili, što rost cen, ź jakim sutykajucca niekatoryja siemji, moža ŭskładnić padtrymańnie niezvyčajna vysokich tempaŭ rostu, jakija naziralisia ŭ apošnim kvartale.

U pieryjad ź lipienia pa vierasień klučavy dla Fiederalnaj reziervovaj sistemy indykatar inflacyi — indeks cen na spažyvieckija tavary i pasłuhi — vyras na 2,8% u paraŭnańni z 2,1% u papiarednim kvartale, adznačajecca ŭ spravazdačy.

Ekśpierty papiaredžvajuć, što rost cen akazvaje cisk na siemji ź nizkim i siarednim dachodam, u toj čas jak siemji z bolš vysokim dachodam praciahvajuć tracić hrošy biez abmiežavańniaŭ.

Pa słovach Oliviera Alena, staršaha ekanamista Pantheon Macroeconomics, vyniki niadaŭnich apytańniaŭ i danyja pa kredytnych kartkach śviedčać pra toje, što amierykanskija siemji skaračajuć svaje vydatki.

«Słaby rynak pracy, stahnacyja realnych dachodaŭ i trata źbieražeńniaŭ, nazapašanych u pieryjad pandemii, zdajecca, u kančatkovym vyniku adbivajucca na siamiejnych biudžetach», — adznačyŭ ekśpiert.

Inšyja niadaŭnija danyja śviedčać pra pasłableńnie rynku pracy, jakoje ŭžo prymusiła Fiederalnuju reziervovuju sistemu try razy zapar źnizić pracentnyja staŭki.

Tym časam, jak paviedamlaje ahienctva AFP, bum inviestycyj u štučny intelekt z boku OpenAI, Google i inšych technałahičnych hihantaŭ praciahvaŭ nabirać abaroty, utrymlivajučy amierykanski fondavy rynak na ŭzroŭni, blizkim da rekordnaha.

U prahnozie S&P Global Ratings ad 18 śniežnia havorycca, što inviestycyi ŭ štučny intelekt, vierahodna, padtrymajuć ekanomiku, ale ich efiekt moža być nivieliravany palityčnaj niepradkazalnaściu prezidenctva Trampa.

«Ustanoŭlenyja zakonam taryfnyja staŭki ZŠA ŭ 2026 hodzie, mahčyma, nie źmieniacca značna, ale niavyznačanaść u dačynieńni da zakonaŭ, norm, pravił inviestavańnia, vajennych dziejańniaŭ i hieapalityki ŭ cełym zastaniecca vysokaj, — papiaredžvaje S&P. — Hetaja niavyznačanaść, vierahodna, budzie strymlivać inviestycyi i spažyvieckija traty».

• 1
• 0
• 0
• 1
• 0
• 0
• 0
• 0