У Глыбокае зноў спрабуюць прадаць будынак былога кляштара кармелітаў. Ён раз за разам выстаўляецца на аўкцыён ужо некалькі гадоў, але купец дагэтуль так і не знайшоўся.
Па звестках Беларускай універсальнай таварнай біржы, чарговыя таргі прызначаныя на 23 студзеня 2026 года. Стартавая цана — усяго 42 рублі, а мінімальны крок аўкцыёну складае крыху больш за два рублі.
Двухпавярховы будынак кляштара кармелітаў з’яўляецца гісторыка-культурнай каштоўнасцю. Ён быў узведзены ў 1735 годзе. На яго тэрыторыі знаходзіліся жылыя карпусы, бібліятэка, шпіталь, аптэка і склады. У 1812 годзе ў кляштары некалькі дзён спыняўся Напалеон Банапарт.
У 1865 годзе манастыр быў закрыты, а на яго тэрыторыі ўзвялі праваслаўную царкву. Да нашых дзён захаваўся толькі адзін з трох карпусоў будынка.
11 гадоў таму суд прызнаў будынак былога кляштара кармелітаў бесгаспадарчым і перадаў яго ў камунальную ўласнасць. За апошнія тры гады некалькі разоў спрабавалі прадаць аб’ект з аўкцыёну за адну базавую велічыню, але безвынікова.
Лот уключае двухпавярховы цагляны дом з падвалам агульнай плошчай каля 1280 квадратных метраў. Да яго прыкладаецца зямельны ўчастак на 10 сотак з правам арэнды на 40 гадоў. Будучы ўласнік абавязаны будзе захоўваць помнік, бо ён мае статус гісторыка-культурнай каштоўнасці.
Цяпер чытаюць
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?14
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары