Novy mer Ńju-Jorka Zochran Mamdani ŭžo na treci dzień pracy na pasadzie adkryta vystupiŭ suprać prezidenta ZŠA Donalda Trampa. Jak piša The New York Times, pryčynaj staŭ zachop vieniesuelskaha lidara Nikałasa Madura amierykanskimi vajskoŭcami ŭ Karakasie.
U subotu, 3 studzienia, Mamdani apublikavaŭ dopis u sacsietcy X, dzie rezka asudziŭ apieracyju, nazvaŭšy jaje hrubym imknieńniem da źmieny ŭłady ŭ inšaj krainie. Na jaho dumku, adnabakovy napad na suvierennuju dziaržavu źjaŭlajecca aktam vajny i parušaje jak fiederalnaje, tak i mižnarodnaje prava. Ciapier Madura znachodzicca ŭ śledčym izalatary ŭ Ńju-Jorku.
Padčas havorki z žurnalistami mer paviedamiŭ, što asabista patelefanavaŭ Trampu i vykazaŭ adkrytuju niazhodu z praviedzienaj siłavoj apieracyjaj. Pa słovach Mamdani, jon vyrazna abaznačyŭ svaju pazicyju, paśla čaho razmova była zavieršanaja. Jak adreahavaŭ prezident, mer udakładniać nie staŭ. U administracyi Trampa taksama admovilisia kamientavać situacyju.
NYT nahadvaje, što jašče ŭ listapadzie sustreča Trampa i novaabranaha mera ŭ Avalnym kabiniecie prajšła niečakana ciopła: tady prezident chvaliŭ Mamdani i nazyvaŭ jaho razvažlivym čałaviekam. Adnak kanflikt pamiž imi ŭźnik značna chutčej, čym možna było čakać.
Vydańnie adznačaje, što napružanaść situacyi ŭzmacniajecca tym, što Tramp kantraluje raźmierkavańnie fiederalnaha finansavańnia Ńju-Jorka i pry žadańni moža istotna ŭskładnić pracu haradskoj ułady.
U Ńju-Jorku žyvuć tysiačy vieniesuelcaŭ — adna z hrup imihrantaŭ, jakaja raście chutkimi tempami. Mnohija ź ich uciakli ad režymu Madura, i Mamdani raniej abiacaŭ im padtrymku. Pakul niezrazumieła, ci zapatrabuje sudovy praces nad Madura značnych vydatkaŭ z haradskoha biudžetu, u tym liku na dadatkovyja miery biaśpieki.
Jak nahadvaje hazieta, Ńju-Jork užo mieŭ dośvied sudovych pracesaŭ nad vysokapastaŭlenymi abvinavačanymi. Naprykład, padčas utrymańnia ŭ horadzie mieksikanskaha narkabarona Chaakina «El Čapa» Husmana ŭłady byli vymušanyja pierakryvać Bruklinski most padčas jaho pieravozak, što istotna paralizavała ruch transpartu.
Demakrat-sacyjalist Zochran Mamdani zastupiŭ na pasadu mera Ńju-Jorka z 1 studzienia. Jon pieršy mer-musulmanin u historyi hetaha horada. 2 studzienia jon prynios publičnuju prysiahu, pakłaŭšy ruku nie na Bibliju, jak heta było zvyčajna, a na Karan.
Tramp sustreŭsia ŭ Biełym domie z Zochranam Mamdani. Jany pavodzili siabie jak najlepšyja siabry
Demakrat-sacyjalist Zochran Mamdani pieramahaje na vybarach mera Ńju-Jorka
Tramp skazaŭ, za kaho hałasavać na vybarach mera Ńju-Jorka, inakš pareža horadu finansavańnie
Što budzie ŭ Vieniesuele dalej? Try scenaryi
Kamientary