Pamiatajecie biełarusku, jakaja žyła i viała biznes u Litvie, ale nienavidzieła krainu? Daviedalisia, što z fanatkaj Łukašenki ciapier
Jak skłaŭsia los Karyny Mond, jakaja letaś trapiła ŭ skandał u Litvie?
Nahadajem: letaś biełaruska abraziła ŭkrainku, jakaja viadzie pablik pra padziei ŭ Vilni «Nužnyj spravočnik Vilniusa». Chutčej za ŭsio adbyłosia heta vypadkova: Karyna chacieła pierasłać storys sa svaim abraźlivym kamientarom kamuści ź siabrovak, ale pierasłała ŭkraincy.
Paśla hetaha Karyna Mond atrymała svaju chvilinu słavy (i chejtu) u sacyjalnych sietkach.
Vyśvietliłasia, što ŭ 2019 hodzie biełaruska vyjšła zamuž za litoŭca i asieła ŭ Vilni. Tut zajmałasia biznesam: mieła svaju bjuci-škołu, u jakoj vučyła dziaŭčat na majstraŭ manikiuru i piedykiuru. Taksama Karyna pradavała ŭsio nieabchodnaje dla manikiurščyc.
Pry hetym, miarkujučy pa sacyjalnych sietkach, žyćcio ŭ Litvie dla jaje było sucelnym piekłam — razdražniali žančynu navat miascovyja klijenty. Svaju złość Karyna tłumačyła tak: «Ja zrazumieła: niervova-prypadkavaj ja stanaŭlusia, tolki kali pierasiakaju piardzianskuju miažu» (tak žančyna nazyvała litoŭskuju miažu).
Karyna jeździła ŭ Biełaruś, kab razam ź siabroŭkaj-prapahandystkaj Kaciarynaj Zabiańko schadzić na finał łukašenkaŭskaha «Marafonu adzinstva» ŭ «Minsk-Arenu».
Žančyna zamiłoŭvałasia vystupam Koli Łukašenki: «Koleńka. Hanarusia. A što ŭmieje syn VAŠAHA prezidenta?». A ad źjaŭleńnia Łukašenki-starejšaha jana, zdajecca, adčuła kulminacyju patryjatyčnych pačućciaŭ: «I tut ja pavaročvajusia. A Baćka prosta pobač staić, rodnieńki, prosta ŭ prachodzie. Prosta pobač-pobač».
Kali adna z padpisčyc spytała, ci kruta žyć na dźvie krainy, Karyna adkazała: «Kruta, kali abiedźvie krainy kłasnyja. Ale voś Litva ŭ paraŭnańni ź Minskam — siało ŭ tundry ź nieadekvatnymi ludźmi. Tamu chutčej dziŭna — ty byccam padarožničaješ u časie. Nu a ciažka — nie, kali ty lubiš padarožničać».
Ciapier ža Karyna žyvie ŭ Minsku, bo zrazumieła, što žyć moža tolki na radzimie (ale treba adznačyć, što pierajezd jana płanavała jašče da skandału). Pracu ŭ bjuci-śfiery kinuła. U instahramie paznačana, što ź biznesu jana vyrašyła pajści ŭ chatnija haspadyni.
Ale ž heta nie zusim tak: 47‑hadovaja Karyna sprabuje pracavać jak fatohrafka i kaža, što dapamoža śpiecyjalistam ci brendam stvaryć kantent dla sacsietak. Indyvidualnyja fotasiesii jana taksama robić.
Letaś jašče letam žančyna rekłamavała siabie jak fatohrafku ŭ Minsku i Vilni — ale ŭ vyniku z varyjantaŭ zastałasia tolki biełaruskaja stalica. Za 120 rubloŭ jana abiacała addać usie zychodnyja fatahrafii plus 20 apracavanych: «Klijent płacić i zamaŭlaje popu i hrudzi taho raźmieru, jakoha choča».
Ciapier ža, jak raskazali «Našaj Nivie» znajomyja Karyny, jana bolš nie moža jeździć u Vilniu, bo ŭžo nie maje litoŭskaha dazvołu na žycharstva.
«Chachłuša kanał viadzie». Fanatka Łukašenki abraziła ŭkrainku i palivaje brudam Litvu, dzie sama pracuje
Andreja Pavuka, jaki trapiŭ u Litvie ŭ moŭny skandał, zvolnili
Prezident Litvy pazbaviŭ palityka, jaki niadaŭna jeździŭ u Minsk, dziaržaŭnaj uznaharody
«Litoŭskich pieravozčykaŭ mohuć čakać surjoznyja prablemy». Dalnabojščyki ab prapanovie adbirać DNŽ u biełarusaŭ za častyja pajezdki na radzimu
Kamientary