Стала вядома, колькі мірных грамадзян загінула ў Расіі, а колькі ва Украіне за чатыры гады вайны

Вайна, якая цягнецца амаль чатыры гады, няўмольна павялічвае спіс сваіх ахвяр. За лічбамі сухой статыстыкі хаваюцца сотні тысяч трагедый. Гінуць не толькі вайскоўцы, але і мірныя людзі. У зоне баявых дзеянняў гэта часта выпадковыя смерці. Аднак агульныя лічбы ахвяр ясна паказваюць, які бок адвольна абстрэльвае мірныя гарады і цывільныя аб'екты.

Паводле заявы старшыні Следчага камітэта Расіі Аляксандра Бастрыкіна, з пачатку поўнамаштабных ваенных дзеянняў пад атакі з боку Украіны трапілі 44 рэгіёны Расійскай Федэрацыі, якія знаходзяцца ў глыбіні ад лініі фронту. З 2022 года зафіксавана звыш 11 тысяч абстрэлаў і атак з выкарыстаннем беспілотнікаў.

Бастрыкін агучыў колькасць ахвяр сярод мірнага насельніцтва Расіі за чатыры гады вайны: 1074 чалавекі, сярод якіх 39 дзяцей.

Раненні рознай ступені цяжкасці атрымаў 5181 чалавек, з іх 328 — непаўналетнія.

Варта параўнаць гэтыя лічбы са звесткамі мінулага года. Дзесяць месяцаў таму, 2 сакавіка 2025 года, Бастрыкін паведамляў аб 652 загінулых мірных жыхарах, у тым ліку 23 дзецях. На той момант колькасць параненых складала 2980 чалавек (з іх 169 дзяцей).

Такім чынам, за няпоўны год колькасць ахвяр сярод мірнага насельніцтва Расіі вырасла на 65%, а сярод дзяцей на 70%. Колькасць параненых павялічылася ў 1,7 раза.

У той жа час расійскія дзяржаўныя СМІ не згадваюць пра маштабы ахвяр сярод мірнага насельніцтва Украіны, хоць гэтыя лічбы ў разы большыя.

Павялічыць

Упраўленне Вярхоўнага камісара ААН па правах чалавека паведаміла, што з пачатку баявых дзеянняў па 12 студзеня 2026 года ва Украіне пацверджаная гібель па меншай меры 14 999 мірных жыхароў, яшчэ 40 601 цывільная асоба атрымала раненні.

Звяртае ўвагу, што найбольшая колькасць ахвяр прыпадае на самы пачатак вайны — сакавік 2022 года, калі пад расійскай акупацыяй знаходзіліся вялікія тэрыторыі Украіны, з якіх расіяне пасля змушаныя былі адступіць.

Павялічыць

Сярод пацверджаных загінулых — не менш за 763 дзіцяці, сярод параненых — не менш за 2486.

Павялічыць

Упраўленне ААН падкрэслівае, што рэальныя страты сярод мірнага насельніцтва, хутчэй за ўсё, значна вышэйшыя, асабліва ў такіх гарадах, як Марыупаль, Ізюм, Лісічанск, Папасная і Севераданецк, дзе ішлі найбольш інтэнсіўныя баі.

Агулам, абапіраючыся на афіцыйна пацверджаныя звесткі абодвух бакоў і міжнародных арганізацый, за чатыры гады вайны загінула не менш за 16 тысяч мірных жыхароў. З іх — каля 15 тысяч мірных жыхароў Украіны і каля тысячы мірных жыхароў Расіі.

Аднак міжнародныя эксперты папярэджваюць: калі ўдасца атрымаць доступ да ўсіх месцаў масавых пахаванняў і правесці поўную верыфікацыю ў разбураных гарадах, гэтая лічба можа істотна вырасці.

• 0
• 0
• 0
• 3
• 0
• 19
• 13
• 0