Polski nataryus admoviŭsia absłuhoŭvać biełarusa, bo jon ciozka deputata, jakoha ŭklučyli ŭ sankcyjny śpis
Biełarus Aleś Laŭčuk źviarnuŭsia ŭ Biełastoku da nataryusa, kab aformić dakumienty. Usio pavinna było zaniać tydzień, ale vyniku mužčyna tak ničoha i nie atrymaŭ. Nataryus admoviŭsia ź im supracoŭničać, rastłumačyŭšy heta tym, što znajšoŭ mužčynu ŭ sankcyjnym śpisie i što toj uvohule nie moža znachodzicca ŭ Polščy. Praŭda, u śpisie znachodzicca zusim inšy Alaksandr Laŭčuk — deputat Pałaty pradstaŭnikoŭ. Jak udałosia vyjści ź situacyi, Aleś raskazaŭ vydańniu Most.
Aleś pryznajecca, što staŭleńnie nataryusa z samaha pačatku padałosia jamu niezvyčajnym. Biełarus viadzie svoj prajekt — Telegram-kanał DzikMedia, jon taksama zasnavalnik amatarskaha futbolnaha kłuba «Biełastockija dziki». Kaža, nataryus pažartavaŭ, čamu, maŭlaŭ, vykarystoŭvajecca słova «dzik», a nie «vaviorka». Ale «dziŭnyja žarty» — nie pryčyna nie zamaŭlać pasłuhu.
Nieŭzabavie nataryus paviedamiŭ Alesiu, što afarmlać dakumienty jamu nie budzie, pakolki z maja 2023 hoda toj uniesieny ŭ sankcyjny śpis i što jaho ŭjezd i znachodžańnie ŭ Polščy stvarajuć pahrozu biaśpiecy hetaj dziaržavy.
Taki śpis sapraŭdy isnuje, jon raźmieščany na sajcie Ministerstva ŭnutranych spraŭ i administracyi Polščy. 30 maja 2023 hoda ŭ jaho dadali Alaksandra Leŭčuka, hramadzianina Biełarusi 1985 hoda naradžeńnia, deputata Pałaty pradstaŭnikoŭ ad Pružanskaj akruhi. U abhruntavańni havorycca, što jon udzielničaŭ u pryniaćci zakonaŭ, nakiravanych na represavańnie hramadzian Biełarusi, a jahonaja dziejnaść charaktaryzujecca jak prychilnaja da režymu Alaksandra Łukašenki.
«Takaja pazicyja va ŭmovach rasijskich vajennych dziejańniaŭ va Ukrainie, łahistyčnaj i palityčnaj padtrymki, akazanaj Maskvie biełaruskimi ŭładami, a taksama viadzieńnia suprać Polščy hibrydnaj vajny stvaraje surjoznuju ryzyku pravakacyi abo ŭźniknieńnia incydentaŭ, jakija nanosiać škodu mižnarodnaj pazicyi Respubliki Polšča», — śćviardžajecca ŭ tekście abhruntavańnia.
«Nivodnaha pytańnia nie ŭźnikła»
Chacia ŭ Alesia supadajuć z deputatam imia i proźvišča, u ich roznyja imiony pa baćku i daty naradžeńnia. Ale danieści heta da nataryusa jamu tak i nie ŭdałosia.
— Ja zhubiŭ hrošy, čas, — narakaje jon.
Ale dadaje, što apłačvać pasłuhi takoha nataryusa admoviŭsia.
Urešcie Aleś znajšoŭ inšaha nataryusa. Rastłumačyŭ joj situacyju. Jana pravieryła, što ŭ sankcyjny śpis uniesieny zusim inšy čałaviek.
«Nivodnaha pytańnia nie ŭźnikła, usio vyrašyłasia za čatyry dni. Jana jašče ździŭlałasia: «Jak tak, nie pravieryć — heta ž nieprafiesijna», — raskazvaje Aleś.
Ciapier jon raić usim biełarusam u Polščy papiarednie pravieryć śpis na sajcie polskaha ministerstva i ŭ vypadku, kali tam znojdziecca ciozka, źviarnuć uvahu nataryusa, banka abo inšych ustanoŭ, što heta ŭsiaho tolki supadzieńnie.
Ciapier čytajuć
Top sučasnych elitnych žyllovych kompleksaŭ Minska. Kvadrat tam kaštuje da 11 000 dalaraŭ1
Kamientary
a nia jak žabraki i paprašajki .
Žyvie Viečna Volnaja Niezaležnaja Vialikaja Litva !
Słava Nacyi !