«Zasiarodžusia na pracy z ZŠA». Cichanoŭski raskazaŭ pra svaje palityčnyja płany na 2026 hod
Siarhieja Cichanoŭskaha pierastała cikavić błohierstva praź nieefiektyŭnaść u dasiahnieńni ahulnabiełaruskich met. Ale što jon znachodzić efiektyŭnym ciapier? Zapytali ŭ jaho naŭprost.
Tekst Siarhieja publikujecca pa jaho prośbie biez pravak. Heta była jaho ŭmova.
«Meta №1 — viartańnie Biełarusi niejtralnaha statusu»
«U 2026‑2027 hadach ja źbirajusia praciahnuć toje, što ŭžo pačaŭ. Liču, što kali my chočam vyzvalić krainu z pałonu, to nam patrebna pazbycca iluzij, pastavić realistyčnuju metu i mietadyčna ruchacca da jaje ažyćciaŭleńnia. Adzinaj realistyčnaj metaj na bližejšyja hady dla mianie źjaŭlajecca viartańnie Biełarusi niejtralnaha statusu.
Maja łohika prostaja. Hruntujučysia na biahučaj situacyi, u Biełarusi jość dva scenaryi raźvićcia padziej:
1. Stać adstałaj i niaščasnaj rasijskaj kałonijaj, satelitam u cieniu novaj žaleznaj zasłony.
2. Stać cyvilizavanaj, ale niejtralnaj krainaj — jak Finlandyja ŭ čas chałodnaj vajny.
Jość tyja, chto ličyć, što isnuje i treci varyjant — razvał Rasii i chutkaja jeŭraintehracyja Biełarusi. Heta vydatny, ale iluzorny scenar. Jon nie patrabuje ad nas vysiłkaŭ — treba tolki čakać mifičnaha razvału Rasii. A tam, dzie niama vysiłkaŭ, nie budzie i vynikaŭ. Čym daŭžej my siadzim na miescy i čakajem, tym mienš u nas šancaŭ źmianić situacyju. Tym časam spravy ciapier iduć tak, što pa zmoŭčvańni realizujecca mienavita varyjant kałonii, a voś za varyjant niejtralnaj Biełarusi daviadziecca pazmahacca».
«U maim płanie niama Łukašenki»
Dla taho, kab usio heta adbyłosia, na dumku Siarhieja, nieabchodnyja try rečy.
«Pa-pieršaje, pierakanać u pierśpiektyŭnaści hetaha scenaryja ES i ZŠA i viarnuć ich u vialikuju hulniu. Pakul što zachodnija stratehi pravodziać miažu supraćstajańnia pa Buhu i hladziać na Polšču jak na pamiežnuju krepaść.
Pa-druhoje, varta pierakanać u pierśpiektyŭnaści hetaha scenara biełarusaŭ u krainie. Miarkujučy pa apytańniach hramadskaj dumki, zrabić heta budzie nieskładana. I mienavita na ludziach u krainie varta rabić fokus: dyjaspara pradkazalna budzie suprać idei finlandyzacyi, bo jana i tak žyvie na svabodzie i dla jaje naturalna prasoŭvać maksimalisckija patrabavańni.
Pa-treciaje, my musim damahčysia zhody na hety scenaryj na Uschodzie. Niechta skaža, što heta niemahčyma, adnak kali dobra padumać, to mienavita da hetaha Maskva pryjdzie va ŭmovach deficytu resursaŭ i ŭ pošukach novaha bałansu sił.
Źviarnicie ŭvahu: u hetym płanie niama Łukašenki. Pa-pieršaje, čas Łukašenki skančajecca, pa-druhoje: padčas vykanańnia troch vyšej pieraličanych umoŭ niejtralnaść Biełarusi budzie zabiaśpiečana niezaležna ad jaho žadańniaŭ».
«U 2026 hodzie ja zasiarodžusia na pracy z ZŠA»
Siarhiej płanuje pieraklučyć uvieś svoj fokus uvahi na pracu z ZŠA.
«Na maju dumku, mienavita tam u pieršuju čarhu treba dakazać realistyčnaść majoj daktryny. Akramia taho, ZŠA pakul zastajucca adzinym bokam, što realna ŭpłyvaje na vyzvaleńnie našych zakładnikaŭ, i abarona našych intaresaŭ tut prosta patrebnaja».
U suviazi z maštabnymi płanami ŭźnikaje łahičnaje pytańnie: dzie na ŭsio heta buduć bracca hrošy, resursy i kamanda, jakoj na hety momant u palityka niama?
«Kamanda dla pracy ŭ ZŠA patrabujecca kampaktnaja. Paplečniki ŭžo jość, patrebnyja palityčnyja sajuźniki. Ja hatovy pracavać z usimi, chto padzialaje maje pohlady i hatovy prykładać vysiłki da dasiahnieńnia našaj mety. Pieršapačatkovy biudžet zabiaśpiečany za košt biełaruskaha biznesu ŭ vyhnańni.
Ja vielmi ŭdziačny hetym šlachietnym i razumnym ludziam za ich padtrymku i vieru ŭ mianie, a taksama ŭsim, chto dapamahaje mnie nie za hranty i pryvilei, a ad ščyraha serca. Tolki razam my zmožam pabudavać krainu dla žyćcia».
Ciapier čytajuć
Ci mahčymy druhi Čarnobyl? I što ciapier robiać ludzi na toj AES? Navukoŭka adkazvaje na važnyja pytańni4
Ci mahčymy druhi Čarnobyl? I što ciapier robiać ludzi na toj AES? Navukoŭka adkazvaje na važnyja pytańni
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»2323
Kamientary