Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju

Novaja praca amierykanskich navukoŭcaŭ, apublikavanaja ŭ časopisie Environmental Epidemiology, upieršyniu detalova razabrała ŭpłyŭ roznych typaŭ raślinnaści na zdaroŭje serca, vykarystaŭšy dla hetaha štučny intelekt i pohlad z rakursu piešachoda, zaŭvažyŭ telehram-kanał cybulinka.

Pohlad vačyma piešachoda

Daśledčyki ŭžyli ałharytmy hłybokaha navučańnia dla analizu 350 miljonaŭ panaram siervisu Google Street View pa ŭsich Złučanych Štatach. Niejrasietka litaralna pa piksielach raźbirała kožnuju vyjavu, vyłučajučy drevy, travu i inšuju zielaninu (kusty ci kvietki).

Pavialičyć

Hetyja źviestki supastavili z historyjaj zdaroŭja 88 788 udzielnic maštabnaha «Daśledavańnia zdaroŭja miedsiaścior» (Nurses' Health Study), za jakimi nazirali na praciahu 18 hadoŭ. Taki padychod dazvoliŭ navukoŭcam acanić mienavita toje asiarodździe, jakoje ludzi bačać štodzień pierad svaimi voknami i padčas prahułak.

Drevy ratujuć, trava — nie zaŭsiody

Vyniki analizu byli nieadnaznačnymi.

Navukoŭcy zafiksavali, što vysoki pracent bačnych dreŭ u radyusie 500 mietraŭ ad doma statystyčna źviazany sa źnižeńniem ryzyki sardečna-sasudzistych zachvorvańniaŭ, pryčym hetaja suviaź była najbolš vyraznaj dla išemičnaj chvaroby serca.

U toj ža čas pavieličeńnie płoščy hazonaŭ i inšaj nizkaj raślinnaści, naadvarot, karelavała z pavyšeńniem ryzyki zachvorvańniaŭ. Hetyja vysnovy zastalisia ŭ sile navat paśla ŭliku takich faktaraŭ, jak uzrovień dachodaŭ, zabrudžvańnie pavietra, ščylnaść nasielnictva i ład žyćcia pacyjentak.

Čamu hazon moža być škodnym?

Tłumačeńnie takoj roźnicy kryjecca ŭ fizijałahičnych i ekałahičnych miechanizmach.

Drevy značna bolš efiektyŭna źnižajuć stres praz pramy psichafizijałahičny adkaz arhanizma, a taksama vydatna spraŭlajucca ź niejtralizacyjaj haradskoha šumu, filtracyjaj pavietra i źmiakčeńniem ekstremalnaj śpioki dziakujučy mahutnamu cieniu.

Trava i drobnyja kusty takich achoŭnych ułaścivaściaŭ praktyčna nie majuć. Bolš za toje, utrymańnie idealnych hazonaŭ časta patrabuje vykarystańnia piestycydaŭ i rehularnaj pracy šumnych hazonakasiłak z ruchavikami ŭnutranaha zharańnia, što stvaraje dadatkovuju nahruzku na ekałohiju i niervovuju sistemu.

Taksama vialikija travianistyja prastory ŭ ZŠA časta źjaŭlajucca prykmietaj rajonaŭ ź nizkaj ščylnaściu zabudovy, dzie haradskoje asiarodździe nie spryjaje špacyram, prymušajučy žycharoŭ zaležać ad aŭtamabilaŭ.

Pavialičyć

Daśledčyki padkreślivajuć, što vykarystańnie ahulnych spadarožnikavych indeksaŭ zielaniny mahło raniej maskavać hetuju nieadnarodnaść, źmiešvajučy karysnyja drevy z patencyjna škodnymi faktarami, źviazanymi z utrymańniem hazonaŭ.

Vierdykt dla kamiennych džunhlaŭ

Dla žycharoŭ takich haradoŭ, jak Minsk, dzie ŭ novych rajonach usio azielanieńnie składajecca z travy i kvołych sadžancaŭ pamiž palami zaasfaltavanych parkovak, hetaje daśledavańnie hučyć jak tryvožny sihnał. 

Dla hramadskaha zdaroŭja heta aznačaje nieabchodnaść pierahladu stratehij azielanieńnia haradoŭ. Navukoŭcy zaklikajuć palitykaŭ i architektaraŭ nadavać pryjarytet mienavita raźvićciu «haradskich lasoŭ» i zachavańniu darosłych dreŭ, bo inviestycyi ŭ drevavy masiŭ prynosiać značna bolšy miedycynski efiekt, čym stvareńnie zvyčajnych łuhoŭ i kvietnikaŭ.

• 9
• 0
• 0
• 0
• 1
• 0
• 0
• 1