Kiroŭcu aŭtobusa z Mahilova adpravili za kraty za łajki ŭ «Adnakłaśnikach»
Andrej Šmajankoŭ — zvyčajny kiroŭca z Mahilova, jaki lubić savieckija matacykły i pajezdki na pryrodu. Jaho asudzili pa palityčnych artykułach za aktyŭnaść u sacsietkach.
Andreju Šmajankovu 52 hady, jon žyvie ŭ Mahilovie. Viadoma, što junactva mužčyny prajšło ŭ Kryčavie — tam jon vučyŭsia ŭ Abłasnym licei №4, jaki skončyŭ u 1990 hodzie.
Andrej pracavaŭ kiroŭcam aŭtobusa. Viadoma, što raniej jon jeździŭ na zarobki ŭ Rasiju — naprykład, minułym letam pracavaŭ kiroŭcam maršrutki ŭ padmaskoŭnym Źvianiharadzie, ale paśla viarnuŭsia ŭ Biełaruś.
Miarkujučy pa sacsietkach, Andrej — zaŭziaty amatar techniki. Jon cikavicca aŭtamabilami i matacykłami, asabliva fanacieje ad marki «Java». Na jaho staroncy šmat fota transpartu i natatak pra praviły darožnaha ruchu. U volny čas mužčyna lubić vybracca na pryrodu i paźbirać hryby.
U jaho jość žonka i syn.
Pieraśled mahiloŭca pačaŭsia z-za jaho staronki ŭ «Adnakłaśnikach». Śpiecyfika hetaj sacsietki takaja, što pastaŭleny pad pastom «kłas» (łajk) aŭtamatyčna pracuje jak repost, u vyniku ŭpadabany dopis aŭtamatyčna adlustroŭvajecca ŭ stužcy čałavieka. Mnohija karystalniki pra heta nie viedajuć. Šmajankoŭ niekalki razoŭ łajkaŭ naviny z 2020 hoda i amal napeŭna zabyŭsia pra heta.
Andreja asudzili pavodle č. 1 art. 367 KK (paklop na Łukašenku) i art. 370 (ździek ź dziaržaŭnych simvałaŭ). Sud Leninskaha rajona Mahilova prysudziŭ jamu kałoniju ci chimiju z nakiravańniem — dakładny termin nieviadomy.
«Naša Niva» — bastyjon biełaruščyny
PADTRYMAĆ
Kamientary