Namieśnika dyrektara bujnoha pradpryjemstva ź Dziatłaŭščyny pasadzili za «sadziejničańnie ekstremizmu»
Siarhiej Vasiukievič 20 hadoŭ pracavaŭ na pradpryjemstvie «Izakom Płast», jakoje vypuskaje hnutkija izalavanyja płastykavyja truby. Ale ciapier jon za kratami.
Siarhieju Vasiukieviču 42 hady, jon rodam ź Dziatłava. Skončyŭ miascovuju škołu №3 i Navahrudski handlova-ekanamičny kaledž. Paśla słužby ŭ vojsku atrymaŭ vyšejšuju adukacyju ŭ BDEU pa śpiecyjalnaści «Łahistyka i cenavaja palityka».
Pracavać pačynaŭ u Dziatłaŭskim «Rajkaapźniešhandli», a paśla pierajšoŭ markietołaham u miascovaje pradpryjemstva «Izakom». Apošnija 11 hadoŭ Siarhiej byŭ namieśnikam dyrektara pa kamiercyi ŭ staličnym ofisie «Izakom Płast».
Dla Dziatłaŭščyny hrupa kampanij «Izakom» i «Izakom Płast» — heta važny zavod. Pradpryjemstva vyrasła na miescy zakinutaha zavoda draŭlanych kanstrukcyj i pieratvaryłasia ŭ hihanta, dzie pracujuć 270 čałaviek — vialikaja ličba dla rajcentra.
Tam vypuskajuć hnutkija izalavanyja truby, jakija ekspartujucca ŭ Rasiju i vykarystoŭvajucca ŭ dziaržprahramach. U 2025 hodzie, kali Siarhiej užo byŭ pad pieraśledam, kampanija atrymała ŭznaharodu «Lidar enierhaefiektyŭnaści».
Siarhiej čałaviek šyrokaha kruhahladu. Jon lubić elektrakary, sačyŭ za inviestycyjami ŭ mietały i akcyi bujnych rytejleraŭ, cikavicca historyjaj i muzykaj. U siamji dvoje dziaciej. Taksama Siarhiej zajmajecca sadam.
Jon apošni raz byŭ anłajn u sacsietkach u sakaviku 2025 hoda. Prysud jamu vynies Minski haradski sud pavodle častak 1 i 2 artykuła 361‑4 KK — «sadziejničańnie ekstremisckaj dziejnaści». Vierahodna, jaho asudzili pa spravie Hajuna.
Siarhiej z taho času nie źjaviŭsia anłajn — najchutčej, prysud źviazany z pazbaŭleńniem voli ŭ kałonii.
«Naša Niva» — bastyjon biełaruščyny
PADTRYMAĆ
Kamientary
[Zredahavana]