Emihracyja z ZŠA ŭpieršyniu pieravysiła imihracyju. Vyjazdžajuć najbolš u Jeŭropu. Čamu i kudy?

U minułym hodzie ZŠA sutyknulisia ź situacyjaj, jakoj nie nazirałasia z časoŭ Vialikaj depresii: z krainy źjechała bolš ludziej, čym u jaje prybyła. Pavodle raźlikaŭ Instytuta Brukinhsa, u 2025 hodzie ZŠA pieražyli «admoŭnaje salda mihracyi» sa strataj kala 150 000 čałaviek, i hety adtok, vierahodna, pavialičycca ŭ 2026 hodzie. U pryčynach novaha trendu raźbirałasia vydańnie The Wall Street Journal.

Jak adznačaje vydańnie, apošni raz, padobnaja situacyja fiksavałasia ŭ 1935 hodzie. Siońnia kirunak emihracyi — krainy Jeŭropy i Łacinskaj Amieryki.

Chto i kudy źjazdžaje?

Usiaho za miažoj, pavodle roznych acenak, žyvie ad 4 da 9 miljonaŭ hramadzian ZŠA.

Sapraŭdny bum nazirajecca ŭ Jeŭropie. U Partuhalii kolkaść amierykancaŭ padskočyła bolš čym na 500% z pačatku pandemii i vyrasła na 36% tolki za 2024 hod. U Ispanii i Niderłandach kolkaść rezidentaŭ z ZŠA padvoiłasia za apošnija 10 hadoŭ, a ŭ Čechii — vyrasła bolš čym u dva razy.

Letaś u Hiermaniju pierajechała bolš amierykancaŭ, čym niemcaŭ u Amieryku. Irłandyja pryniała 10 000 čałaviek z ZŠA ŭ 2025 hodzie (udvaja bolš, čym hodam raniej), a kolkaść zajavak na irłandski pašpart dasiahnuła rekordnych 40 000.

U Vialikabrytanii pražyvaje bolš za 325 000 amierykancaŭ. Kolkaść zajavak na hramadzianstva dasiahnuła maksimumu z pačatku viadzieńnia ŭliku ŭ 2004 hodzie.

Simvaličny rubiež byŭ projdzieny ŭ Narviehii — ciapier tam žyvie bolš ludziej, narodžanych u ZŠA, čym u ZŠA — ludziej, narodžanych u Narviehii.

Akramia Jeŭropy, papularnymi napramkami zastajucca Mieksika (dzie ŭ 2022 hodzie žyło kala 1,6 miljona hramadzian Amieryki) i Kanada (bolš za 250 000).

Pryčyny emihracyi z ZŠA

Na pohlad aŭtara, matyvacyja emihrantaŭ — heta spałučeńnie ekanamičnych pryčyn i rasčaravańnia ŭ amierykanskim ładzie žyćcia.

Hałoŭny faktar na siońnia — mahčymaść atrymlivać vysokija amierykanskija zarobki, pracujučy dystancyjna, ale pry hetym žyć u krainach ź nižejšym koštam žyćcia, kamfortnym ładam žyćcia, dastupnaj miedycynaj, jakasnaj adukacyjaj i nizkim uzroŭniem złačynnaści.

Tak, biaśpieka adyhryvaje nie apošniuju rolu. Niekatoryja baćki, jak pryvodzić prykład WSJ, pierajazdžajuć, kab ich dzieci nie stali achviaraju stralaniny ŭ škołach, jakaja ŭ Amierycy zdarajecca rehularna. U krainach Jeŭropy, jak i ŭ Biełarusi, svabodnaje vałodańnie zbrojaj zabaronienaje, i incydentaŭ z vykarystańniem ahniastrelnaj zbroi — minimum, a kolkaść zabojstvaŭ u razy nižejšaja, čym u ZŠA.

Palityčnaja turbulentnaść i pieravybrańnie Trampa, jakoje niekatoryja nazyvajuć pryčynaj Donald Dash, mahčyma, taksama ŭ niejkaj stupieni ŭpłyvajuć na situacyju. Adnak, jak padkreślivaje vydańnie,

trend pačaŭsia nie ciapier, a raniej — z raźvićciom dystancyjnaj pracy i rostam koštu žyćcia.

Tak kolkaść zapytaŭ na admovu ad hramadzianstva ZŠA jašče ŭ 2024 hodzie padskočyła na 48%.

Apytańnie Gallup pakazała, što dola tych, chto chacieŭ by emihravać z ZŠA, vyrasła z 10% u 2008 hodzie da 20% letaś. A siarod žančyn u vieku 15—44 hadoŭ, u vieku, kali dziaciej naradžajuć, hetaja ličba dasiahaje 40%.

Tendencyja zakranaje i moładź. Bolš za 100 000 amierykanskich studentaŭ navučajucca za miažoj, bo heta značna tańniej. U Vialikabrytanii kolkaść amierykancaŭ, jakija atrymlivajuć dypłom, vyrasła na 14% tolki letaś. U toj ža čas, patok zamiežnych studentaŭ u ZŠA letaś skaraciŭsia na 17%.

Jak iranizuje WSJ,

novaja «amierykanskaja mara» dla mnohich amierykancaŭ — heta vyjechać z Amieryki.

Heta padryvaje daŭniuju vieru ŭ «amierykanskuju vyklučnaść», bo ŭsio bolš ludziej robiać dla siabie vysnovu, što jakaść žyćcia za miažoj stała lepšaj, čym u ZŠA.

• 19
• 4
• 6
• 2
• 0
• 1
• 1
• 0