Kiraŭnik dyjaspary biełarusaŭ u Krymie vystupiŭ u padtrymku rasijskaj ahresii suprać Ukrainy
Staršynia rady rehijanalnaj nacyjanalna-kulturnaj aŭtanomii «Biełarusy Kryma» Raman Čahryniec vystupiŭ u Minsku z prarasijskimi zajavami, zaŭvažyła «Svaboda».
Siarod inšaha Raman Čahryniec zajaviŭ, što dzień abjadnańnia Kryma z Rasijaj nibyta pavinien adznačacca i ŭ Biełarusi.
«Dzień uźjadnańnia Kryma z Rasijaj — heta dziaržaŭnaje śviata ŭ Rasijskaj Federacyi. My žyviom u ahulnaj dziaržavie, jakaja nazyvajecca sajuznaj, tamu ja ŭpeŭnieny, što śviata važnaje nie tolki dla Kryma i Rasii, a i, viadoma ž, dla Biełarusi. Usio ž Krymskaja viasna stała pavarotnym, na moj pohlad, momantam u hieapalityčnym žyćci śvietu», — skazaŭ Raman Čahryniec.
Zapis ź jaho vykazvańniem apublikavali ŭ Telegram-kanale «Russkij dom v Minskie», dzie dva dni tamu adbyŭsia kruhły stoł na temu «Krymskaja viasna: dośvied intehracyi, humanitarnyja, kulturnyja, palityčnyja i ekanamičnyja aśpiekty».
Pavodle Čahrynca, krymskija padzie 2014 hoda nibyta zrušyli pracesy pa ŭsim śviecie.
«Śviet mianiajecca. Tak, krymčanie prykłali da hetaha ruku. Krym — heta jaskravy prykład taho, jak možna absalutna biez adzinaha strełu, tolki za košt rašeńnia i dumki ludziej, viarnuć na radzimu takuju vialikuju terytoryju. Krymčanie zrabili svoj vybar, i refierendum pakazaŭ, što hety vybar byŭ absalutna pravilny», — skazaŭ kiraŭnik krymskaj arhanizacyi biełarusaŭ.
Čamu zajava Čahrynca niepraŭdzivaja
Rasija anieksavana ŭkrainski paŭvostraŭ Krym i horad Sievastopal u sakaviku 2014 hoda, kali Ukraina była asłablenaja praciahłymi akcyjami pratestu suprać rašeńnia tahačasnych uładaŭ spynić jeŭrapiejskuju intehracyju Ukrainy. Pierad hetym jana ŭviała ŭ Krym svaje vojski i vajskovuju techniku biez apaznavalnych znakaŭ.
Niezakonny refierendum, što arhanizavali prarasijskija siły ŭ Krymie, prachodziŭ pad kiraŭnictvam z Maskvy i pad nahladam uzbrojenych «zialonych čałaviečkaŭ», jakija, jak paźniej pryznaŭ Pucin, byli pradstaŭnikami rasijskaj armii.
U Kijevie i ŭ krainach Zachadu hety fiktyŭny refierendum i anieksiju Kryma nie pryznali.
Padčas niezakonnych dziejańniaŭ u Krymie ŭzbrojenyja rasijskija vojski zachapili orhany ŭłady, vajskovyja haradki i marskija karabli, aeraport, inšyja abjekty.
Padčas šturmu parłamienta Aŭtanomnaj Respubliki Krym zahinuli dva cyvilnyja, a kali zachoplivali centr Uzbrojenych sił Ukrainy, u Simfieropali zahinuli adzin ukrainski vajskoviec i adzin cyvilny.
Ciapier čytajuć
Muzyka, malavańnie i tancy ŭ škołach i himnazijach — usio? Što viadoma pra skaračeńni nastaŭnikaŭ-estetystaŭ2
Muzyka, malavańnie i tancy ŭ škołach i himnazijach — usio? Što viadoma pra skaračeńni nastaŭnikaŭ-estetystaŭ
«Kali b ja byŭ śledčym KDB, ja b padkreśliŭ toje samaje». Fiaduta — pra schavanyja sensy «Kałasoŭ pad siarpom tvaim», uvahu siłavikoŭ da svajho rukapisu i zahadku z treciaj častkaj ramana Karatkieviča1212
Kamientary
[Zredahavana]