Hurt BTS viarnuŭsia na scenu. Vy mahli pra ich nie čuć, a ŭ Sieuł na hety kancert źjechałasia 250 tysiač čałaviek

U subotu ŭ Sieule paśla doŭhaha pierapynku adbyŭsia kancert samaj paśpiachovaj paŭdniovakarejskaha hurta apošnich hadoŭ — BTS. Na płošču Kvanchvamun u histaryčnym centry Sieuła, pavodle danych pramoŭteraŭ, pryjšli kala 105 tysiač hledačoŭ. Usiaho, pa acenkach haradskich uład, dziela vystupleńnia hrupy ŭ horad pryjechała kala 250 tysiač čałaviek ź inšych rehijonaŭ krainy i z-za miažy, piša Bi-bi-si.

Paviedamlajecca, što prabicca da sceny zmahli tolki 22 tysiačy čałaviek, astatnija stajali za aharodžaj i hladzieli vystupleńnie na vielizarnych ekranach.

U honar viartańnia da svajoj šmatmiljonnaj armii prychilnikaŭ hety kancert boj-bend daŭ biaspłatna.

Raniej padličvali, što budučy kancert hurta BTS u centry Sieuła pryniasie ekanomicy Paŭdniovaj Karei amal miljard dalaraŭ.

Siem udzielnikaŭ hrupy — RM, Jin, Suga, J-Hope, Jimin, V i Jung Kook — źjaŭlajucca kumirami ŭ siabie na radzimie i vielmi papularnyja va ŭsim śviecie.

Napiaredadni byŭ vypuščany ich doŭhačakany albom Arirang (jaho nazva — adsyłka da samaj viadomaj karejskaj narodnaj pieśni, svojeasablivaha sientymientalnaha himna pra pieraadoleńnie ciažkaściej i ruch da lepšaj budučyni), a subotni kancert staŭ pieršym sumiesnym vystupleńniem z kastryčnika 2022 hoda.

Tady, na piku svajoj papularnaści, boj-bend abviaściŭ, što biare paŭzu, kab prajści abaviazkovuju vajskovuju słužbu. Pieršym u armiju syšoŭ Jin u 2022 hodzie, apošnim — Suga, jaki zaviaršyŭ słužbu ŭ červieni minułaha hoda, paśla čaho stała mahčymym uźjadnańnie hrupy.

Dla miljonaŭ prychilnikaŭ pa ŭsim śviecie subotni kancert tranślavaŭsia ŭ pramym efiry na Netflix. U miežach pahadnieńnia z BTS płatforma atrymała ekskluziŭnyja pravy na stryminh vystupleńnia, a taksama na dakumientalny film pra ŭźjadnańnie hrupy — markietynhavy pośpiech na fonie šmatmiljardnych inviestycyj u karejskuju industryju zabaŭ.

U krasaviku BTS adpravicca ŭ vialiki suśvietny tur. Hurt daść 82 kancerty ŭ bolš čym 30 haradach śvietu — ad Sinhapura i Tokia da Miunchiena i Łos-Andželesa.

Pa prahnozach, tur moža prynieści kala 1 młrd dalaraŭ, adnak ułady Paŭdniovaj Karei asabliva padkreślivajuć, što ŭkład BTS u raźvićcio krainy vychodzić daloka za miežy ekanamičnaha składnika.

Muzyčny žanr K-pop uźnik u Paŭdniovaj Karei. Jon spałučaje ŭ sabie roznyja styli — elektrapop, chip-chop, rytm-n-bluz — i vyras u cełuju subkulturu.

• 0
• 0
• 0
• 0
• 0
• 0
• 0
• 0