Ofis Cichanoŭskaj čakaje paćviardžeńnia ŭkrainskaha boku nakont vizitu ŭ Kijeŭ na nastupnym tydni
«Ja vielmi spadziajusia, što ŭ nas atrymajecca sustreć va Ukrainie Dzień Voli — narodnaje nacyjanalnaje śviata biełarusaŭ. Śviata, jakoje režym «nie vitaje»», — zajaviła demakratyčnaja lidarka Biełarusi ŭ intervju «Jeŭrapiejskaj praŭdzie».
Cichanoŭskaja zajaviła, što zaraz čakaje ad ukrainskaha boku paćviardžeńnia nakont dat.
«Viadziom pieramovy i pra źmiastoŭnuju častku. Tut šmat pytańniaŭ — i łahistyka, i biaśpieka. I, viadoma, ja chaču pryjechać nie z pustymi rukami — a pryvieźci dapamohu dla dobraachvotnikaŭ. Dla mianie vielmi važna padtrymać Ukrainu ciapier, bo ad losu Ukrainy zaležyć los Biełarusi», — skazała Cichanoŭskaja.
Jana kaža, što viedaje — taki vizit byŭ by mocnym sihnałam dla biełarusaŭ: «Sihnałam pra toje, što Ukraina — za volnuju Biełaruś, što Łukašenka — vajenny złačynca, što biełarusy i ŭkraincy — razam suprać rasijskaha impieryjalizmu. Heta sapraŭdy važna, bo biełarusy hladziać na Ukrainu ź vialikaj nadziejaj i ŭsprymajuć prezidenta Zialenskaha jak lidara nie tolki Ukrainy, ale i ŭsiaho rehijona».
«Paviercie, kožnaja zajava prezidenta Zialenskaha ŭ padtrymku volnaj Biełarusi natchniaje ludziej na baraćbu suprać łukašyzmu. Kali my ŭbačyli, što ŭ nas źjaŭlajecca taki mocny sajuźnik — ludziej heta vielmi natchniła», — zaznačyła jana i zaklikała biełarusaŭ u Kijevie prynosić na Dzień Voli bieł-čyrvona-biełyja ściahi.
Niekalki dzion tamu stała viadoma, što vizit u Kijeŭ možna adbycca ŭ rajonie 25 sakavika. Damova pra budučy vizit u stalicy Ukrainy była zaklučana padčas sustrečy Śviatłany Cichanoŭskaj i Uładzimira Zialenskaha ŭ Vilni 25 studzienia.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie15
Kamientary