«My pakiniem Iran vielmi chutka». Tramp anansavaŭ zakančeńnie vajny niezaležna ad taho, ci budzie ździełka ź Iranam

Usiaho dva dni tamu Tramp śćviardžaŭ, što ŭ pieramovach ź Iranam dasiahnuty prahres, i pahražaŭ razhromnym udaram u vypadku ich pravała, piša Bi-bi-si.

Novyja zajavy Trampa tolki padkreślivajuć, nakolki supiarečlivymi i časam nieadnaznačnymi mohuć być vykazvańni Vašynhtona pra toje, jak moža skončycca vajna, jakaja praciahvajecca ŭžo piaty tydzień, kamientuje Reuters.

Tym časam pres-sakratar Biełaha doma Kerałajn Levit paviedamiła, što ŭ sieradu ŭ 21:00 pa vašynhtonskim časie prezident ZŠA pradstavić abnoŭlenuju infarmacyju pa Iranie ŭ zvarocie da nacyi.

«My vielmi chutka pojdziem», — zajaviŭ Tramp žurnalistam u aŭtorak. Pavodle jaho słoŭ, heta moža adbycca «na praciahu dvuch tydniaŭ, moža być, dvuch tydniaŭ, moža być, troch».

Na pytańnie, ci źjaŭlajecca paśpiachovaja dypłamatyja nieabchodnaj umovaj dla zaviaršeńnia ZŠA apieracyi «Epičnaja lutaść», Tramp adkazaŭ admoŭna.

«Iranu nie treba zaklučać ździełku, nie, — skazaŭ jon. — Nie, im nie treba zaklučać ździełku sa mnoj».

Pa słovach Trampa, Złučanyja Štaty dasiahnuli met, pastaŭlenych pierad pačatkam avijaŭdaraŭ pa Iranie ŭ kancy lutaha — abmiežavańnie zdolnaści Irana atrymać jadziernuju zbroju, i zaraz ZŠA «zaviaršajuć pracu». Jon taksama skazaŭ, što iranskija ŭłady «prosiać ab ździełcy».

Tehieran kateharyčna admaŭlaje viadzieńnie pieramoŭ. Iranskija ŭłady zajaŭlajuć, što kantakty z ZŠA abmiažoŭvalisia pieradačaj paviedamleńniaŭ ad Vašynhtona praz rehijanalnych pasiarednikaŭ, u tym liku Pakistan.

Na praciahu apošnich dzion ZŠA ściahvajuć u rajon Piersidskaha zaliva siły chutkaha reahavańnia. Tam užo znachodzicca 31‑ia ekśpiedycyjnaja hrupa marskoj piachoty, u rehijon nakiroŭvajecca 11‑ia hrupa i častki 82‑j pavietrana-desantnaj dyvizii.

26 sakavika Tramp zajaviŭ, što adkłaŭ udary pa enierhietycy Irana na 10 dzion, heta značyć da 6 krasavika. 30 sakavika amierykanski prezident śćviardžaŭ, što ŭ pieramovach ź Iranam dasiahnuty prahres, i pryhraziŭ razhromnym udaram u vypadku ich pravała.

«Dasiahnuty značny prahres, ale kali pa jakoj-niebudź pryčynie pahadnieńnie nie budzie dasiahnuta ŭ najbližejšaj budučyni, što, vierahodna, adbudziecca, i kali Armuzski praliŭ nie budzie nieadkładna «adkryty dla biźniesu», my zavieršym naša cudoŭnaje «znachodžańnie» ŭ Iranie, padarvaŭšy i całkam źniščyŭšy ŭsie ich elektrastancyi, naftavyja śvidraviny i vostraŭ Chark (i, mahčyma, usie apraśnialnyja ŭstanoŭki!), jakija my naŭmysna jašče nie «kranuli»», — pisaŭ Tramp u Truth Social.

U aŭtorak ministr abarony ZŠA Pit Chiehsiet, raźvivajučy zajavy Trampa, skazaŭ na bryfinhu žurnalistam, što prezident hatovy zaklučyć ździełku ź Iranam, kab pakłaści kaniec vajnie, jakaja zabrała tysiačy žyćciaŭ, raspaŭsiudziłasia pa ŭsim blizkaŭschodnim rehijonie, parušyła pastaŭki enierhanośbitaŭ pa ŭsim śviecie i pahražaje abrynuć suśvietnuju ekanomiku.

Pieramovy «vielmi realnyja, aktyŭnyja i nabirajuć abaroty», skazaŭ Chiehsiet, adnak ZŠA hatovy praciahnuć vajnu z «jašče bolšaj intensiŭnaściu», kali Iran nie vykanaje amierykanskija ŭmovy.

Jak i Tramp, kiraŭnik Pientahona pry hetym zajaŭlaje, što ŭ krainie adbyłasia źmiena režymu, a novaje iranskaje kiraŭnictva pavinna być «razumniejšym, čym papiaredniaje». «U nas usio bolš i bolš varyjantaŭ, a ŭ ich mienš, — śćviardžaje Chiehsiet. — Najbližejšyja dni buduć vyrašalnymi».

Korpus vartavych isłamskaj revalucyi ŭ aŭtorak adkazaŭ novaj pahrozaj u adras amierykanskich kampanij na Blizkim Uschodzie, pahražajučy atakavać u tym liku pradstaŭnictvy Microsoft, Google, Apple, Intel, IBM, Tesla, Boeing, Hewlett Packard, Dell i JP Morgan.

«My raim supracoŭnikam hetych ustanoŭ nieadkładna evakuiravacca sa svaich pracoŭnych miescaŭ, kab abaranić svaje žyćci», — havaryłasia ŭ zajavie KSIR. Na pytańnie, ci niepakojać jaho pahrozy ŭ adras hetych kampanij, Tramp adkazaŭ admoŭna. «Im užo amal niama čym pahražać», — skazaŭ jon.

Tehieran praciahvaje vyklučać mahčymaść dypłamatyčnaha vyrašeńnia kanfliktu. Choć ministr zamiežnych spraŭ Irana Abas Arahčy ŭ aŭtorak u intervju telekampanii Al Jazeera paćvierdziŭ, što atrymlivaje paviedamleńni ad śpiecpasłańnika prezidenta ZŠA Styva Uitkofa. Pavodle jaho słoŭ, paviedamleńni prychodziać nie tolki praz pasiarednikaŭ, ale i «napramuju, jak i raniej, ale heta nie aznačaje, što my viadziem pieramovy».

• 0
• 0
• 4
• 3
• 0
• 0
• 0
• 0