Apošnim časam u Bresckuju balnicu chutkaj miedycynskaj dapamohi štodnia źviartajucca jak minimum dva-try pacyjenty z padazreńniem na šalenstva: ich ukusili žyvioły.
Usiaho z pačatku hoda ŭ Bresckaj vobłaści praviedziena 280 daśledavańniaŭ na hety virus. I ŭ 25 vypadkach dyjahnaz paćvierdziŭsia. Heta ŭ piać razoŭ bolš, čym za taki ž pieryjad 2025 hoda, adznačajuć śpiecyjalisty.
— Pieradača virusa šalenstva čałavieku mahčymaja ad chvorych na šalenstva žyvioł pry roznych vidach kantaktaŭ. Heta moža być nie tolki ŭkus, ale i drapina, a taksama abśluniavańnie skurnych pakrovaŭ i ślizistych abałonak, na jakich jość mikraraskoliny, — raskazała telekanału «Biełaruś 4» zahadčyca adździaleńnia asabliva niebiaśpiečnych infiekcyj Bresckaha abłasnoha centra hihijeny i epidemijałohii Iryna Klacko.
Šalenstva čaściej za ŭsio vyjaŭlajuć u lisic. Adnak jaho pieranosčykami mohuć być i inšyja žyvioły, u tym liku chatnija — katy i sabaki. Ličycca, što jany pačynajuć pavodzić siabie ahresiŭna, ale heta nie zaŭsiody tak.
— Kali my bačym, što dzikaja žyvioła pryjšła ŭ nasieleny punkt, na lecišča abo na ŭčastak, heta ź vialikaj dolaj vierahodnaści śviedčyć pra toje, što žyvioła ŭsio ž taki chvoraja na šalenstva. Bo dzikija źviary zvyčajna starajucca nie padychodzić da čałavieka, — dadaje śpiecyjalist.
Važna pamiatać: kali pry zaražeńni šalenstvam chvoramu nie akazać miedycynskuju dapamohu, vynik budzie śmiarotnym. Tamu, kali jość sumnieńni, lepš pierastrachavacca i źviarnucca da doktara.
Kamientary