Abrezaŭ vałasy, skinuŭ z bałkona i praciahvaŭ źbivać. U Mahilovie asudzili mužčynu, jaki ledź nie zabiŭ kachanuju na vačach u jaje maci
Žychar Mahilova ŭ ałkaholnym čadzie ŭčyniŭ sapraŭdnuju raspravu nad svajoj sužycielkaj. Tolki nieabyjakavaść susiedziaŭ, jakija vyklikali milicyju, vyratavała žyćcio achviary.
Žančyna bolš nie chacieła žyć z mužčynam, jaki pastajanna piŭ. Toj vyrašyŭ pamirycca i zaprasiŭ maci kachanaj u hości, nibyta pakazać śviežy ramont i razam vypić. Ale kali padčas zastolla žančyna admovilisia mirycca, haspadar kvatery pieratvaryŭsia ŭ źviera.
Mužčyna dušyŭ žančynu, ciahaŭ za vałasy i pahražaŭ zabić. Kali jana pasprabavała vybiehčy z kvatery, jon schapiŭ nož i prosta adrezaŭ joj vałasy.
Na bałkonie ahresar pačaŭ akunać hałavu žančyny ŭ viadro z vadkimi špalerami, ablivaŭ vadoj i biŭ.
U niejki momant jon prosta vyšturchnuŭ žančynu z bałkona druhoha paviercha. Ale na hetym jon nie spyniŭsia — vybieh uniz, za vałasy zaciahnuŭ pakalečanuju achviaru nazad u dom i praciahnuŭ źbivać, ihnarujučy sproby jaje maci spynić hetaje varjactva.
Śledstva naličyła na ciele žančyny jak minimum 18 surjoznych paškodžańniaŭ. Ekśpiertyza paćvierdziła: mužčyna — chraničny ałkaholik, ale ŭ momant napadu jon vydatna razumieŭ, što robić. Sam abvinavačany vinu tak i nie pryznaŭ, adnak fakty i śviedčańni susiedziaŭ byli macniejšymi za jahonaje maŭčańnie.
Mužčynu prysudzili da kałonii ŭzmocnienaha režymu na 15 hadoŭ i 6 miesiacaŭ.
Prysud u zakonnuju siłu nie ŭstupiŭ.
Kamientary
15 hadoŭ heta tabie nie chuchry-muchry, vidać dastaŭ usich na rajonie.