Vučniaŭ 10 kłasa buduć adpraŭlać na kruhłasutačnyja palavyja zbory na 10 dzion
Jany pačnucca z 25 maja i buduć pravodzicca štohod.
Z 25 maja štohod ź junakami dziasiatych kłasaŭ buduć pravodzicca vučebna-palavyja zbory. Ich praciahłaść budzie składać 10 dzion (60 hadzin), paviedamlaje pres-słužba Minadukacyi.
Adznačajecca, što zbory pravodziacca z metaj udaskanaleńnia pradmietnych kampietencyj i adpracoŭki praktyčnych navykaŭ pa vučebnym pradmiecie «Dapryzyŭnaja i miedycynskaja padrychtoŭka».
Praviadzieńnie vučebna-palavych zboraŭ budzie vieścisia va ŭmovach, nabližanych da ŭmoŭ vajskovaj čaści, u farmacie kruhłasutačnaha znachodžańnia navučencaŭ.
Adnak, adznačaje Minadukacyi, pry niemahčymaści arhanizavać praviadzieńnie vučebna-palavych zboraŭ u farmacie kruhłasutačnaha znachodžańnia navučencaŭ jany pravodziacca ŭ tyja ž terminy na bazie škoł i himnazij.
Dla maksimalnaha efiektu z metaj prafaryjentacyi na atrymańnie vajskovych śpiecyjalnaściaŭ i farmavańnia maralna-psichałahičnaj hatoŭnaści da vajskovaj słužby praduhledžana ŭzajemadziejańnie z vajskovymi čaściami (vajskovymi kafiedrami, fakultetami, vajskovymi navučalnymi ŭstanovami) pa pytańniach vydzialeńnia asabovaha składu, nieabchodnaj vajskovaj majomaści, vučebnaha abstalavańnia i srodkaŭ navučańnia — jak pry kruhłasutačnym farmacie, tak i pry praviadzieńni na bazie škoły (himnazii).
Pieravod vučniaŭ u XI kłas ažyćciaŭlajecca pa vynikach hetych zboraŭ, a vyzvaleńnie ad vučebna-palavych zboraŭ mahčyma tolki pa miedycynskich pakazańniach.
Dla dziaŭčat praduhledžana praviadzieńnie praktyčnych zaniatkaŭ pa miedycynskaj padrychtoŭcy (taksama ŭ abjomie 60 hadzin) na bazie ŭstanoŭ achovy zdaroŭja, rehijanalnych padraździaleńniaŭ Biełaruskaha tavarystva Čyrvonaha Kryža abo rehijanalnych padraździaleńniaŭ MNS. Pry adsutnaści takoj mahčymaści zaniatki mohuć pravodzicca niepasredna va ŭstanovach ahulnaj siaredniaj adukacyi. Dla efiektyŭnaha navučańnia rekamiendujecca pryciahvać miedycynskich rabotnikaŭ i vykarystoŭvać simulacyjnyja mietady.
Kamientary