U časy ŠI kaštoŭnymi kadrami robiacca tyja, chto ŭmieje hurtavać i scemientoŭvać

Pra karennuju źmienu pryjarytetaŭ na rynku pracy razvažaje kałumnistka Financial Times Sara O'Konar.

Vy toj čałaviek, jaki znachodzić čas rastłumačyć novym kaleham, chto ŭ kamandzie za što adkazvaje? Ci toj, chto pieršym zaŭvažaje, što prajekt idzie nie tudy, bo roznyja adździeły pa-roznamu razumiejuć zadaču? Mahčyma, vy viedajecie imia čałavieka na inšym paviersie, zdolnaha za piać chvilin vyrašyć marudnuju prablemu, nad jakoj vaš kaleha bjecca tydniami?

Kali vy adkazali «tak» na bolšaść hetych pytańniaŭ, značyć, vy vykonvajecie tak zvanuju «pracu pa zhurtavańni» (glue work): naładžvajecie suviazi pamiž ludźmi, bačycie ahulnuju karcinu, zapaŭniajecie arhanizacyjnyja prahały i dapamahajecie ŭtrymlivać prajekty razam.

Sam termin glue work u 2019 hodzie prapanavała inžynierka Tania Rejli (Tanya Reilly). Jana źviarnuła ŭvahu na paradoks: hetaja praca nieabchodnaja dla funkcyjanavańnia kamandy, ale ličycca druhasnaj u paraŭnańni z «asnoŭnymi» navykami — naprykład, napisańniem koda.

Bolš za toje, dla šarahovych śpiecyjalistaŭ jana moža być navat niebiaśpiečnaj: pakul jany zajmajucca kaardynacyjaj i dapamohaj inšym, jany mienš času addajuć techničnaj pracy, jakaja zvyčajna i viadzie da pavyšeńnia. U vyniku tyja, chto lepš za ŭsich umieŭ zhurtavać kalektyŭ, albo spynialisia ŭ karjernym roście, albo zusim sychodzili ź industryi.

Takoje staŭleńnie mieła i inšaje niehatyŭnaje nastupstva: na kiraŭničyja pasady traplali ludzi, jakich prasoŭvali tolki za ich techničny hienij. U vyniku jany akazvalisia na miescach, dzie patrabujucca lidarstva i ŭmieńnie kamunikavać — rečy, da jakich u ich nie było ni cikavaści, ni dośviedu. Jak praviła, heta nie abiacała ničoha dobraha ni padnačalenym, ni arhanizacyi ŭ cełym.

Hetaja łohika nie abmiažoŭvajecca tolki IT-śfieraj. Padobnyja miechanizmy pracujuć u navucy, jurysprudencyi i inšych halinach, dzie jość vyrazna vyznačanyja «klučavyja» kampietencyi. Pry hetym daśledavańni pakazvajuć, što žančyny čaściej za mužčyn dobraachvotna (abo pa prośbie kiraŭnictva) zajmajucca hetaj niespryjalnaj dla karjery pracaj pa hurtavańni.

Adnak z raźvićciom štučnaha intelektu situacyja pačynaje źmianiacca — i davoli chutka. U prahramavańni, naprykład, mašyny ŭžo zdolnyja hienieravać kod, vykonvać rucinnyja zadačy i navat prapanoŭvać hatovyja rašeńni. Heta značyć, što toje, što jašče ŭčora ličyłasia hałoŭnym navykam, siońnia častkova aŭtamatyzujecca.

Što ž zastajecca čałavieku? Kiravańnie hetymi instrumientami, razumieńnie kantekstu, pastanoŭka zadač, kaardynacyja pamiž roznymi ŭdzielnikami pracesu i ŭlik patreb klijenta. Inakš kažučy — taja samaja rola «kleju».

Jak adznačajuć sami inžyniery, ciapier heta samyja važnyja kampietencyi. Ludzi, jakija ŭžo vałodali navykami kaardynacyi, ciapier adčuvajuć siabie ŭpeŭniena: im praściej adaptavacca da novaj realnaści. Zatoje tym, chto vyznačaŭ svaju prafiesijnuju vartaść vyklučna praz umieńnie pisać biezdakorny kod, davodzicca značna składaniej.

Pavodle słoŭ aŭtarki, heta važny napamin pra toje, što novyja technałohii nie prosta źniščajuć abo stvarajuć pracoŭnyja miescy. Jany źmianiajuć samu ijerarchiju navykaŭ: štości, što doŭhi čas ihnaravałasia, stanovicca samym kaštoŭnym. U vypadku z prahramnym zabieśpiačeńniem heta adbyvajecca z ašałamlalnaj chutkaściu.

U inšych śfierach, mabyć, źmieny buduć iści pavolniej. A tam, dzie klučavyja navyki pakul nie paddajucca aŭtamatyzacyi, jany, mahčyma, i zusim nie nadyduć.

U lubym razie, pierakananaja Sara O'Konar, ciapier samy prydatny momant, kab kiraŭniki paŭsiul zadalisia prostymi, ale važnymi pytańniami: chto hurtuje, cemientuje vašu kamandu? Ci atrymlivajuć hetyja ludzi naležnaje pryznańnie i šaniec na rost? I ci vučycca astatniaja kamanda brać na siabie chacia b častku hetaj roli?

Bo ŭ technałahičnaj śfiery štučny intelekt nie zrabiŭ hetyja navyki kaštoŭnymi raptoŭna — jany zaŭsiody byli takimi. Jon tolki zrabiŭ hety fakt nastolki vidavočnym, što ihnaravać jaho bolš niemahčyma.

• 6
• 0
• 0
• 2
• 0
• 0
• 0
• 0