Sumki z halštukaŭ i zaplečniki z pakunkaŭ ad čypsaŭ Lays — top biełaruskich majstroŭ, jakija robiać apsajklinh-rečy
Trend na adzieńnie i aksiesuary sa starych rečaŭ praciahvaje nabirać usio bolšuju papularnaść. Niekatoryja dyzajniery stvarajuć sapraŭdnyja šedeŭry z taho, što inšyja adpravili b na śmietnik.
Sabrali top apsajklinh-vyrabaŭ ad biełaruskich majstroŭ.
Topy z abrusaŭ i torby z halštukaŭ
Brend Galubka, stvorany Taćcianaj Hołubievaj, pačynaŭsia sa składanych šmatsłojnych kašul i aviersajz-łonhślivaŭ. Paźniej jana taksama dadała da svaich ekśpierymientaŭ chustki i topy z babulinych survetak. A zusim niadaŭna pačała šyć torbački z halštukaŭ.
Bolšuju častku «syraviny» majstryca znachodzić u sekand-chendach, źviartajučy ŭvahu tolki na rečy ŭ dobrym stanie.
Dalikatnaja «survetačnaja» kalekcyja ad brenda PLUM
Adzieńnie ad Plum słavicca svaimi ŭnikalnymi rečami — bolšaść ź ich niepaŭtornyja i prapanoŭvajucca ŭ adzinym ekzemplary. Tak vyjšła i z kapsułaj One-of-a-Kind z rečami, sšytymi ź vintažnych tkanin. Niešta ź ich raniej było survetkami i nakidkami ź niepaŭtornaj vyšyŭkaj.
Ceny na takija kamplekty varjirujucca ad 150 da 300 dalaraŭ.
Ceły harderob ź firanak
Brend TSUDA taksama nie prajšoŭ mima mody na tradycyjny, časam viaskovy vajb. Tut možna znajści i kimano, i maniški, i fartuchi, i štany, i chustki — i ŭsio heta stvoranaje ź firanak.
Takija rečy dadajuć vobrazam šmatsłojnaści i aryhinalnaści, adrazu źviartajučy na siabie ŭvahu. Ceny na vyraby startujuć ad 69 dalaraŭ.
Šopiery-kałažy
Mastačka Maryja Aŭdziajuk z Bresta šyje pryšpilnyja cacki i šopiery sa staroha adzieńnia i tkanin, što zalažalisia ŭ babuli.
Atrymlivajucca vielmi aryhinalnyja i jarkija torby z raznastajnymi siužetami — naprykład, ź viaskovaj chatkaj pad višniaj, italjanskim piejzažam ci matyvacyjnym pasyłam «Usio mahčyma».
Košt šopieraŭ: 90 rubloŭ.
Kašalki z płastykavych pakietaŭ
Minčuk Artur užo niekalki hadoŭ raźvivaje svoj eka-brend Iriskin.ecolab — jon z hałavoj nyrnuŭ u spravu nadańnia druhoha žyćcia materyjałam, pra jakija bolšaść z nas navat nie padumała b, što jany na niešta prydatnyja.
Chłopiec šyje nieardynarnyja kašalki i vokładki na pašparty z pakunkaŭ ad kavy i płastykavych pakietaŭ, šopiery z rekłamnych banieraŭ i navat torby i zaplečniki z batutnaj sietki.
Dla Artura ŭsio heta nie prosta azart i šyrokaje (plus dosyć biudžetnaje) pole dla tvorčych ekśpierymientaŭ, ale i ŭłasny ŭniosak u ekałohiju.
Ceny — u zaležnaści ad składanaści rečaŭ (ad 25 da 200 rubloŭ).
Bombiery z savieckich pościłak
Minčanka Kryścina Žaŭryd stvaraje vierchniaje adzieńnie z pościłak, jakija ŭ najlepšym vypadku raniej visieli na ścienach ci ŭpryhožvali łožki ŭ interjerach, a ŭ horšym — prosta lažali miortvym hruzam u šafach niekalki dziasiatkaŭ hadoŭ.
Na pościłki roznych koleraŭ, a taksama habieleny dziaŭčyna paluje na sajtach kštałtu «Kufra». Nabytuju bazu rupliva myje, a paśla siadaje za šyćcio — usio robicca rukami, tamu i ceny na hatovyja vyraby ad 150 dalaraŭ.
Pry hetym bombiery raskuplajuć vielmi chutka, jak unutry Biełarusi, tak i za miažoj.
Kamientary