Хто той замежнік, які забіў жонку і згвалтаваў падчарку ў Добрушы
У кастрычніку там мужчына забіў цяжарную жонку, раніў нажом непаўналетняга пасынка і згвалціў падчарку каля трупа жонкі. «Люстэрка» распавядае, што вядома пра гэтую сям'ю.
У афіцыйным паведамленні пракуратура кажа, што мужчына не быў беларусам, называючы яго «замежнік». Карыстальнікаў сацсетак зацікавіла, адкуль ён. Адна з удзельніц абмеркавання падзялілася, што знаёмая з гэтай гісторыяй. Па яе словах, гэта была шматдзетная сям'я з Украіны, якая ўцякала ад вайны. «Усім горадам ім дапамагалі, а аказалася вось так усё…», — адзначыла яна.
«Пагражаў фізічнай расправай» яшчэ за пяць гадоў да трагедыі
«Люстэрка» праверыла гэтую інфармацыю і знайшло сям'ю. Іх біяграфічныя даныя супалі з інфармацыяй пракуратуры, а візуальныя дэталі — з фатаграфіяй з месца злачынства.
Вольга і Антон (імёны змененыя) родам з Данецкай вобласці. Вольга ў сацсетках пазначала сваім родным горадам Салядар і Бахмут, Антон — пасёлак Дробышава, Салядар і Бахмут.
У Вольгі было чацвёра дзяцей ад мінулага шлюбу — тры сыны і дачка. У 2018 годзе яна аформіла развод з іх бацькам і падала на аліменты. У маі 2019 года Вольга выйшла замуж за Антона, шлюб зарэгістравалі ў Салядары. У афіцыйных базах захаваліся запісы аб тым, што ў мінулым Антон быў судзімы, у тым ліку за разбой, некаторы час знаходзіўся ў вышуку.
У пары нарадзілася двое дзяцей. Аднак летам 2020 года адносіны разладзіліся. У верасні мужчына ўчыніў сямейную сварку, «выказваўся нецэнзурнай лаянкай у адрас сваёй жонкі і пагражаў ёй фізічнай расправай», гаворыцца ў адным з судовых дакументаў. Вольга звярнулася ў паліцыю, справа дайшла да суда, Антона аштрафавалі.
Паралельна жанчына звярнулася ў суд, каб аформіць аліменты на іх агульных дзяцей — і яе запыт падтрымалі. У судовым дакуменце гаворыцца, што шлюбныя адносіны фактычна былі спыненыя з-за «пастаянных сварак і розных поглядаў на сямейнае жыццё».
«Ехалі абсалютна ў нікуды»
Але ж, здаецца, гісторыя пары на гэтым не закончылася. Пасля гэтага яны сумесна купілі дом, верагодна, у сям'і з'явілася яшчэ адно дзіця. У 2022—2023 гадах Бахмут быў цалкам разбураны ў ходзе баёў падчас расійскага ўварвання ва Украіну і акупаваны. З студзеня 2023 года Салядар таксама апынуўся пад акупацыяй, горад называлі «самай гарачай кропкай вайны» на той момант.
Вольга і Антон вырашылі пераехаць у Беларусь.
— Узяць усіх у ахапку і ўцякаць ва ўкрыццё не так лёгка. Мы спачатку, так, хацелі застацца, а потым — ну не, рызыкаваць дзецьмі — гэта неяк занадта. Ехалі абсалютна ў нікуды, — прызнавалася Вольга ў сюжэце беларускага дзяржканала, які выйшаў летам 2023 года.
Спярша вялікая сям'я знаходзілася ў пункце часовага размяшчэння, пасля пераехала ў Добруш. У інтэрв'ю Вольга распавядала, што ў Беларусі ёй падабаецца.
У сюжэце гаварылася, што сям'і дапамаглі з пошукам працы. Чым Антон займаўся ў Беларусі — невядома. На адным з сайтаў, прысвечаных пошуку вакансій, захавалася рэзюмэ Вольгі, апублікаванае ў 2024 годзе. Яна пісала, што ў мінулым адвучылася на кухара, але ж гатова «разгледзець любыя варыянты» ў Мінску. Жанчына таксама паказвала, што не замужам і мае беларускае грамадзянства (цяжка сказаць, ці гэта было праўдай).
«Аказаліся ў цяжкай жыццёвай сітуацыі»
Летам 2025 года сям'я Вольгі і Антона атрымала матэрыяльную дапамогу, якую збіралі пры ўдзеле Добрушскай камісіі па справах непаўналетніх, Беларускага таварыства Чырвонага Крыжа і неабыякавых беларусаў. Мясцовае выданне ў публікацыі аб гэтым адзначала, што «найбольш актыўнымі былі медыкі, работнікі галіны культуры, адукацыі». Мяркуючы па фота, Вользе ўручылі мікрахвалевую печ.
У той жа публікацыі гаварылася, што некаторыя з тых сем'яў, што атрымалі дапамогу, трапілі ў поле зроку камісіі па справах непаўналетніх «таму, што аказаліся ў цяжкай жыццёвай сітуацыі».
Трагедыя здарылася ўжо праз тры месяцы — у кастрычніку 2025 года. П'яны Антон забіў Вольгу, якая на той момант была цяжарная. Адзін з сыноў спрабаваў яе абараніць — і атрымаў нажавыя раненні. На шчасце, хлопчык змог выратавацца.
Пасля гэтага мужчына, «дэманструючы нож, здзейсніў каля трупа забітай ім жонкі дзеянні сэксуальнага характару ў адносінах да падчаркі, пасля чаго згвалтаваў яе».
Антона затрымаў АМАП, пад вартай ён чакае суда па цэлым спісе артыкулаў. Мужчыну пазбавілі бацькоўскіх правоў на траіх яго дзяцей. Усіх дзяцей спярша забралі ў бальніцу, пасля накіравалі ў тэрытарыяльны сацыяльна-педагагічны цэнтр. Пасля іх уладкавалі ў прыёмную сям'ю.
Каментары