U Polščy admianili kancert skandalnaha repiera Kańje Uesta

U Polščy ŭ piatnicu abviaścili pra admienu červieńskaha kancertu amierykanskaha repiera Kańje Uesta, jaki šmat hadoŭ epatavaŭ publiku antysiemickimi, rasisckimi i pranacysckimi vykazvańniami, piša Bi-bi-si.

Kancert Kańje Uesta, jaki piać hadoŭ tamu źmianiŭ imia na «Jie», płanavaŭsia na 19 červienia ŭ horadzie Chožuŭ na poŭdni Polščy. Jon moh by stać pieršym jaho vystupam u Polščy za 15 hadoŭ, ale ŭ piatnicu stadyjon, dzie płanavałasia vystupleńnie, zajaviŭ, što jaho nie budzie — «pa farmalnych i jurydyčnych pryčynach».

Raniej ministr kultury Polščy Marta Ciankoŭskaja zajaviła, što ličyć rašeńnie zaprasić Uesta «nieprymalnym».

U chodzie jeŭrapiejskaha turne Uest, akramia Polščy, źbiraŭsia vystupić u Brytanii i Francyi, ale brytanskija ŭłady 6 krasavika zabaranili jamu ŭjezd u krainu, a praź niekalki dzion pra toje, što rašeńnie ab kancercie adkładziena, abviaścili arhanizatary mierapryjemstva ŭ Marseli.

U lutym minułaha hoda Uest pačaŭ pradavać futbołki sa svastykaj, z-za čaho handlovaja anłajn-placoŭka Shopify vydaliła jaho kramu.

Praz try miesiacy repier vypuściŭ tvor pad nazvaj «Chajl Hitler», u jakim paviedamiŭ, što nacystam jaho zrabili ciažba za apiekunstva nad dziciem i zamarožvańnie jaho aktyvaŭ.

U studzieni, pierad tym jak abviaścić ab jeŭrapiejskim tury i vypusku novaha alboma, Uest apłaciŭ cełuju staronku ŭ haziecie Wall Street Journal, na jakoj paprasiŭ prabačeńnia za svaje vykazvańni i ŭčynki.

«Ja nie nacyst i nie antysiemit. Ja lublu jaŭrejaŭ», — napisaŭ Uest i patłumačyŭ, što «straciŭ suviaź z realnaściu» z-za bipalarnaha rasstrojstva.

U Polščy prapahanda nacysckaj simvoliki źjaŭlajecca złačynstvam, za jakoje naležyć da troch hadoŭ turmy.

Dla Polščy nacysckaja simvolika i ideałohija — asabliva balučaje pytańnie. Nacysckaja Hiermanija akupavała i rasčlaniła krainu. Nacysty masava departavali palakaŭ, a taksama stvaryli na terytoryi krainy łahiery śmierci, dzie zabili miljony jeŭrapiejskich jaŭrejaŭ, u tym liku 3 młn polskich.

«Hety artyst publična vykazvaŭ antysiemickija pohlady, prynižaŭ ciažar złačynstvaŭ i zarablaŭ na futbołkach sa svastykaj, — napisała ministr kultury Ciankoŭska ŭ sietcy X. — Heta naŭmysny pierachod miežaŭ i narmalizacyja nianaviści. U kultury nie pavinna być miesca tym, chto karystajecca joju dla raspaŭsiudžvańnia nianaviści».

Pierad tym, jak pra admienu kancerta abviaściŭ polski stadyjon, pres-sakratar ministerstva kultury Polščy Piotr Jendžejeŭski skazaŭ Bi-bi-si, što ŭłady nie mohuć prosta zabaranić kancert, pakolki dla hetaha niama adpaviednaha zakona.

Jon dadaŭ, što MZS Polščy — taksama suprać kancerta Uesta.

• 7
• 0
• 0
• 0
• 0
• 0
• 1
• 0