«Tysiaču dalaraŭ za miesiac — realna». Kolki ciapier zarablajuć miedyki ŭ Biełarusi?

Aficyjnyja ličby

Siaredni zarobak daktaroŭ u 2025 hodzie, pavodle danych, ahučanych prafsajuzam, skłaŭ 4006 rubloŭ (kala 3445 rubloŭ na ruki), a siaredniaha miedpiersanału — 2075 rubloŭ (kala 1785 rubloŭ na ruki).

U paraŭnańni z 2024 hodam zarobak daktaroŭ u siarednim vyras na 12,1%, a siaredniaha miedpiersanału — na 15,5%.

Što pakazvajuć vakansii?

Kali hladzieć pa vakansijach, to zarpłatu 4000 rubloŭ bruta ŭbačyć składana. Niemałaja častka śpiecyjalistaŭ pracuje na 1,25 abo 1,5 staŭki, što prykmietna ŭpłyvaje na vynikovuju zarpłatu ŭ miedykaŭ.

Pry hetym chapaje vakansij, dzie daktaram i na adnu staŭku prapanujuć zarobak prykmietna bolšy za siaredni pa halinie.

Adny z samych vysokaapłatnych vakansij znachodziacca ŭ Słucku i Salihorsku, dzie ŭ pryvatnych miedcentrach «Žadajem zdaroŭja» hatovyja płacić pa 8 000 rubloŭ doktaru ultrahukavoj dyjahnostyki, jaki musić mieć nie mienš za try hady stažu pracy i pieršuju kvalifikacyjnuju katehoryju.

Pavialičyć

Šukajuć u miedcentr i miedsiastru, jakoj hatovyja płacić 1800—2000 rubloŭ.

Zarpłatu kala 5000 rubloŭ prapanujuć namieśnikam hałoŭnaha doktara ŭ 32‑j paliklinicy Minska i ŭ rajonnaj balnicy Vilejki.

Pavialičyć

Taksama davoli vysokija zarpłaty prapanujuć aniestezijołaham i chirurham.

Naprykład, balnica chutkaj miedycynskaj dapamohi ŭ Hrodnie šukaje doktara-chirurha (płastyčnaha), jakomu hatovyja płacić ad 4 da 6 tysiač u miesiac.

U ahraharadku Babiničy, što pad Viciebskam, šukajuć zahadčyka dermatałahičnaha adździaleńnia z zarpłataj u 3400—3500 rubloŭ. Kandydat musić mieć nie mienš za piać hadoŭ stažu.

Šarahovym śpiecyjalistam zvyčajna płaciać nie bolš za 2000—2500 rubloŭ za staŭku.

Tak, naprykład, aftalmołahu ŭ druhoj balnicy Minska hatovyja płacić 2100—2500 rubloŭ.

Pavialičyć

Stamatołah u hetaj ža balnicy moža raźličvać na 3000 rubloŭ, a reabilitołah na 0,5 staŭki — na 1200—1400 rubloŭ.

Chirurh u paliklinicy №3 Babrujska pry pracy na 0,75 staŭki budzie mieć kala 2000 rubloŭ.

Krychu bolš za vuzkich śpiecyjalistaŭ zarablajuć daktary ahulnaj praktyki (raniej ich nazyvali ŭčastkovymi terapieŭtami). Takomu śpiecyjalistu ŭ toj ža babrujskaj paliklinicy hatovy płacić ad 2400 da 3000 rubloŭ na poŭnuju staŭku.

Pavialičyć

Doktaru ahulnaj praktyki ŭ paliklinicy №6 Bresta prapanujuć 2840 rubloŭ na staŭku.

Što kažuć sami daktary?

Doktar ahulnaj praktyki, jakaja pracuje na paŭtary staŭki, kaža, što apošni hod stabilna atrymlivaje nie mienš za 3500 rubloŭ na ruki.

«U daktaroŭ ahulnaj praktyki ŭ paliklinikach zarpłata tradycyjna krychu vyšejšaja, čym u vuzkich śpiecyjalistaŭ. Jany mohuć mieć pryblizna 1800—2000 rubloŭ, u nas kala 2300—2400. Plus amal usie biaruć 1,5 ci 1,25 staŭki, tamu ŭ vyniku atrymlivajecca hodny pa biełaruskich mierkach zarobak», — kaža doktarka.

Pavialičyć

Inšy surazmoŭca pracuje kardyjołaham, i taksama na paŭtary staŭki. Doktar kaža, što maje ad 3 da 4 tysiač rubloŭ na miesiac.

«Kali prychodziać studenty, to za pracu ź imi dapłačvajuć, tamu ŭ takija miesiacy byvaje zarpłata pa 4 tysiačy. U zvyčajnyja — u miežach 3200—3300 rubloŭ», — pryznajecca śpiecyjalist.

Doktarka, jakaja zajmajecca ŭltrahukavoj dyjahnostykaj i, jak i inšyja surazmoŭcy, pracuje na paŭtary staŭki, maje kala 3000 rubloŭ na ruki.

Usie miedyki, ź jakimi daviałosia parazmaŭlać, adznačajuć, što za apošnija hady zarobki ŭ miedykaŭ sapraŭdy padraśli, tamu zarablać tysiaču dalaraŭ na miesiac i bolš pry žadańni całkam realna.

Pavialičyć

Praz heta ahučanyja aficyjnyja ličby siarednich zarobkaŭ u ich sumnievu nie vyklikajuć.

«Akramia taho, što mnohija pracujuć bolš čym na staŭku, jość aniestezijołahi i chirurhi, jakija, aproč bolš vysokich zarpłat na staŭku, majuć dadatkovyja dziažurstvy. Taksama daśviedčanyja daktary mohuć padpracoŭvać u pryvatnych miedcentrach, dzie hadzina pracy apłačvajecca lepš. A hałoŭnyja daktary, ich namieśniki i inšyja kiraŭničyja pasady naohuł apłačvajucca hodna. Prynamsi pa biełaruskich mierkach», — kaža adna ź miedykaŭ-surazmoŭcaŭ.

• 9
• 0
• 2
• 5
• 0
• 1
• 0
• 0