Madźjar zaklikaŭ Zialenskaha adnavić tranzit nafty pa trubapravodzie «Družba»
Budučy premjer-ministr Vienhryi Pieter Madźjar zaklikaŭ prezidenta Ukrainy Uładzimira Zialenskaha adnavić tranzit rasijskaj nafty pa trubapravodzie «Družba», kali jon prydatny da ekspłuatacyi, zajaviŭšy, što novy ŭrad nie pojdzie «ni na jakija sastupki» ŭ hetym pytańni.
Pra heta, jak piša «Jeŭrapiejskaja praŭda», Madźjar skazaŭ padčas pres-kanfierencyi, cytuje Telex.
Padčas razmovy z presaj lidar «Cisy» źviarnuŭsia da ŭkrainskaha prezidenta z zaklikam «vykanać svajo abiacańnie» i adnavić pracu trubapravoda «Družba».
U svaim zvarocie Madźjar taksama pieraściaroh Zialenskaha ad «šantažu» Vienhryi adnosna razbłakavańnia naftapravoda.
«My nie pojdziem ni na jakija sastupki, i ja b nie raiŭ, jašče raz kažu, my nie viedajem adzin adnaho, ale ja b nie raiŭ ukrainskamu prezidentu iści hetym šlacham. Heta nie ŭsprymuć nie tolki ŭ Vienhryi, ale i ŭ Jeŭropie; jeŭrapiejskija lidary taksama nie ŭsprymuć, što jon choča pierahladzieć užo ŭzhodnienyja rečy i šantažavać jeŭrapiejskich lidaraŭ», — zajaviŭ Madźjar.
Jon paraŭnaŭ učynki ŭkrainskaha prezidenta z patrabavalnymi pavodzinami padčas viačery.
«Heta kali b niechta pajšoŭ na viačeru, jaho zaprasili, a potym jon pačaŭ šantažavać: kali nie budzie leča, ci nie śpiakuć na siarednim ahni, to ja zrablu toje i toje. Na maju dumku, heta niapravilnaje staŭleńnie, i ja b nie raiŭ tak pastupać», — skazaŭ Madźjar.
Dziejučy premjer-ministr Vienhryi Viktar Orban napiaredadni zajaviŭ, što Ukraina vykazała hatoŭnaść adnavić pastaŭki nafty pa trubapravodzie «Družba» ŭ paniadziełak, pry ŭmovie, što Budapiešt razbłakuje kredyt ES na sumu 90 młrd jeŭra.
Pry hetym kiraŭnik vienhierskaha ŭrada paŭtaryŭ svaju pazicyju ab tym, što jon razbłakuje kredyt tolki paśla taho, jak buduć adnoŭleny pastaŭki rasijskaj nafty pa trubapravodzie «Družba».
Pavodle źviestak «Jeŭrapiejskaj praŭdy», pasły ES pasprabujuć kančatkova ŭchvalić kredyt na 90 młrd jeŭra dla Ukrainy 22 krasavika.
Budučy premjer-ministr Vienhryi Pieter Madźjar daŭ zrazumieć, što nie budzie błakavać kredyt ES dla Ukrainy na 90 młrd jeŭra, pakolki rašeńnie ŭžo pryniataje, ale paćvierdziŭ, što Budapiešt nie budzie ŭ im udzielničać.
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary