Kaciaryna Andrejeva pryniała prestyžnuju ŭznaharodu za strym, praź jaki trapiła za kraty

Andrejeva była ŭdastojena premii jašče ŭ 2021 hodzie za strym z Płoščy Pieramienaŭ, padčas jakoha jaje zatrymali, a zatym sudzili ŭ Biełarusi, paviedamlaje «Biełsat».

Premijaj za «niazłomnaje vykanańnie prafiesii žurnalista va ŭmovach, jakija patrabujuć mocnaj asabistaj mužnaści» była ŭznaharodžana taksama Darja Čulcova, jakaja pracavała razam z Kaciarynaj Andrejevaj na Płoščy Pieramienaŭ.

«Dziakuj za takuju vysokuju acenku našaj pracy. Repartaž, jaki tranślavaŭsia ŭ žyvym efiry ciaham troch hadzin, byŭ udastojeny hetaj hanarovaj uznaharody praź niekalki tydniaŭ paśla taho, jak biełaruski sud pryznaŭ hety ž repartaž złačynstvam i pazbaviŭ mianie i maju kalehu Darju Čulcovu svabody i mahčymaści zajmacca lubimaj prafiesijaj», — skazała Kaciaryna Andrejeva na cyrymonii ŭznaharodžańnia.

Jana padzialiłasia, što, choć i znachodzicca ŭ volnaj krainie, pobač z volnymi ludźmi, ale jaje serca i duša z kalehami, jakija pa-raniejšamu znachodziacca ŭ źniavoleńni tolki za toje, što jany žurnalisty.

«Andžej Pačobut, Dzianis Ivašyn, Ludmiła Čekina i jašče 21 čałaviek, siarod jakich moj muž — žurnalist Ihar Iljaš. Usie jany śmieła i bieskaryśliva vykonvali hałoŭny prafiesijny abaviazak — kazać ludziam praŭdu. Ja pierakananaja, što dziakujučy namahańniam mnohich ludziej pa ŭsim śviecie biełaruskija žurnalisty zdabuduć svabodu.

Z udziačnaściu i pavahaj, prymajučy siońnia śpiecyjalnuju premiju imia Darjuša Fikusa, chaču pracytavać słovy Teadora Ruźvielta: «Lepšy padarunak u žyćci — heta mahčymaść ciažka pracavać nad zadačaj, jakaja taho vartaja». Ja ščaślivaja, što ŭ mianie jość taki padarunak», — skazała Kaciaryna Andrejeva.

Pavialičyć

U razmovie z «Biełsatam» jana adznačyła, što hetaja ŭznaharoda — vialiki honar: «Naturalna, kali ja atrymała ŭznaharodu ŭ 2021 hodzie, ja pra heta daviedałasia, i heta stała krynicaj mocnaj padtrymki i nadało mnie siłaŭ u źniavoleńni».

Pry hetym jana padkreśliła, što efir, za katory jaje pakarali, rabiŭsia nie dla premij, a dla hledačoŭ «Biełsatu».

Žurnalistka adznačyła, što padčas mierapryjemstva dla jaje ŭ pieršuju čarhu było važna jašče raz nahadać śvietu i kaleham z Polščy pra źniavolenych žurnalistaŭ. Jana dadała, što Minsk musić adpuścić palitviaźnia Andžeja Pačobuta biez papiarednich umovaŭ.

«Polšča ŭžo zrabiła kroki nasustrač, adkryła pamiežnyja pierachody, i było b vielmi łahičnym, etyčnym i navat imidžava, mahčyma, dla Minsku vyhodnym, kab praz hetyja adkrytyja pierachody pajechaŭ vyzvaleny Pačobut. Spadziajusia, što ŭ nastupny raz usio žurnalisty buduć vyzvalenyja, i režym nie budzie praciahvać represii i nie budzie praciahvać nabirać novych zakładnikaŭ», — skazała Andrejeva.

Darjuš Fikus — polski žurnalist, publicyst i redaktar, adna z klučavych fihur polskaj presy pieryjadu poźniaj Polskaj Narodnaj Respubliki i pačatku demakratyčnych pieraŭtvareńniaŭ.

• 4
• 0
• 0
• 0
• 0
• 0
• 0
• 2