Znojdziena pieśnia Viktara Coja, jakuju ličyli stračanaj

Kalekcyjanier Siarhiej Čubrajeŭ vyjaviŭ zapis amal nieviadomaj pieśni lidara hurta «Kino» Viktara Coja «Dzieci chvilin», jakuju muzyka napisaŭ u 1988 hodzie. 

Kasieta z zapisam, zroblenym 24 červienia 1988 hoda ŭ Leninhradzie, doŭhija hady zachoŭvałasia ŭ Sary Akieren, dački byłoha hienieralnaha konsuła Šviecyi. Pra heta havorycca ŭ intervju Čubrajeva vydańniu «Sobaka», jakoje vyjšła 21 červienia da dnia naradžeńnia Coja, i ŭ 17‑chvilinnym dakumientalnym filmie «Pryvitańnie Karłu Hustavu», jaki vypuściŭ łejbł «Sojuz Ḿjuzik». U zaklučnaj častcy filma hučyć sama pieśnia.

Čubrajeŭ raspavioŭ, što znajšoŭ tekst pieśni «Dzieci chvilin» u archivie basista hurta «Zvuki Mu» Alaksandra Lipnickaha, jaki zahinuŭ u 2021 hodzie.

«Viktar Coj śpiavaŭ jaje tolki dla blizkich siabroŭ, zabaraniaŭ zapisvać na mahnitafon i kazaŭ, što nie hatovy publična jaje vykonvać», — padzialiŭsia Čubrajeŭ.

Pavodle jaho słoŭ, pieršapačatkova ličyłasia, što ŭdałosia zachavać tolki tekst pieśni — Coj napisaŭ słovy pa prośbie Lipnickaha.

Sam Lipnicki raspaviadaŭ u svaim filmie pra «Kino», jaki vyjšaŭ u 2008 hodzie, što ŭpieršyniu pačuŭ pieśniu «Dzieci chvilin» u 1988 hodzie, kali Coj vykanaŭ jaje ŭ Maskvie. «Na majo pytańnie, ci ŭvojdzie jana ŭ novy albom «Kino», jon adkazaŭ admoŭna: «Ni ŭ jakim razie. Jana mnohich pakryŭdzić»», — kazaŭ Lipnicki.

Čubrajeŭ raspavioŭ, što pačaŭ šukać zapis pieśni ŭ zamiežnikaŭ, jakija ŭ 1980‑ia hady pryjazdžali ŭ Leninhrad. «I davoli chutka vyjšaŭ na Saru Akieren, dačku hienieralnaha konsuła Šviecyi ŭ Leninhradzie. Jana pryjazdžała siudy [ŭ Leninhrad] na kanikuły i chutka pasiabravała z andehraŭndnaj tusoŭkaj. U tym liku z Cojem. Ja pačaŭ ź joj pierapisku i raspavioŭ, što šukaju «Dziaciej chvilin», na što jana adkazała: «Ja zapisała jaje na płejer!»».

Akieren zrabiła zapis na viečarynie ŭ muzykanta, udzielnika hurta «Kino» Hieorhija Hurjanava. «Vicia dla nas śpiavaŭ pa niekalki razoŭ lubimyja pieśni typu «Kohda tvoja dievuška bolna», «Bratskaja lubov́», — raspaviała Okieren. — I raptam vyrašyŭ praśpiavać dla nas novuju pieśniu. Jon troški saromieŭsia, nie byŭ upeŭnieny, ale nasamreč adčuvałasia, što jon choča jaje praśpiavać. U mianie z saboj byŭ Walkman, płejer, i ja zapisała».

Na zapisie čuvać, jak Coj kaža svaim siabram, što pieśnia, mahčyma, straciła aktualnaść, i adznačaje, što ŭ tekście šmat cytat ź piesień inšych muzykantaŭ: «Šmat cytat vielmi. Ciažka zrazumieć, bo heta jak palemika ź inšymi hurtami. Tamu što vielmi šmat ich radkoŭ». 

Siarhiej Čubrajeŭ dadaŭ, što na kasiecie taksama jość i inšyja pieśni, jakija nichto nikoli nie čuŭ u akustycy, u tym liku «Pačka sihariet» i «Lubov́ — eto nie šutka». «Ja spadziajusia, u budučyni my ich taksama vykładziem u internet», — adznačyŭ kalekcyjanier.

• 20
• 0
• 0
• 1
• 1
• 0
• 0
• 1