Chitry biełarus źmianiŭ imia i proźvišča, kab abyści zabaronu na ŭjezd u Finlandyju. Ale nie prakaciła

Hramadzianin Biełarusi, jaki raniej atrymaŭ ad Finlandyi dvuchhadovuju zabaronu na ŭjezd u Šenhienskuju zonu, viarnuŭsia na radzimu, źmianiŭ tam imia i proźvišča, aformiŭ novy pašpart i polskuju vizu — i pa novych dakumientach znoŭ zajechaŭ u Jeŭrasajuz praz Łatviju. U sakaviku 2024 hoda jaho zatrymali ŭ Talinie. Administracyjny sud Talina zadavoliŭ chadajnictva estonskaj palicyi i dazvoliŭ trymać čałavieka pad vartaj da vysyłki.

Pra heta śviedčyć pastanova Talinskaha administracyjnaha suda (Tallinna Halduskohus) ad 14 sakavika 2024 hoda pa spravie № 3-24-765. Imia i proźvišča fihuranta sud rasparadziŭsia schavać u apublikavanaj viersii rašeńnia.

Jak źjaviłasia zabarona na ŭjezd

Pieršapačatkova čałaviek nasiŭ inšaje imia i proźvišča. 19 studzienia 2023 hoda Finlandyja vydała jamu pradpisańnie ab vyjeździe, jakim uviała zabaronu na ŭjezd u Šenhienskuju zonu na dva hady — z 8 lutaha 2023‑ha pa 8 lutaha 2025-ha.

Z Šenhienskaj zony jon vyjechaŭ u apošni dazvoleny dzień, 8 lutaha 2023 hoda.

Paźniej u sudzie vyśvietliłasia, što zatrymany nielehalna pracavaŭ u Finlandyi, a z krainy vyjechaŭ u Turcyju.

Novaje imia, novy pašpart i polskaja viza

Viarnuŭšysia ŭ Biełaruś, čałaviek źmianiŭ imia i proźvišča i atrymaŭ novy biełaruski pašpart užo na novaje imia (mahčyma, havorka idzie pra vykarystańnie inšaj tranślitaracyi, a nie pra poŭnuju zamienu imieni i proźvišča) — dakumient vydali 17 lutaha 2023 hoda terminam da 17 lutaha 2033-ha. Zatym jon aformiŭ polskuju vizu katehoryi D, dziejnuju z 22 sakavika 2023 hoda pa 20 sakavika 2024-ha.

22 studzienia 2024 hoda biełarus znoŭ ujechaŭ na terytoryju krain Šenhienskaha pahadnieńnia — praz Łatviju, pa novym biełaruskim pašparcie. Farmalna ŭ jaho była dziejnaja polskaja doŭhaterminovaja viza, adnak zabarona na ŭjezd, nakładzienaja Finlandyjaj, praciahvała dziejničać da lutaha 2025 hoda.

Zatrymańnie ŭ Talinie

12 sakavika 2024 hoda a 11:25 biełarusa zatrymaŭ pamiežnik Paŭnočnaj prefiektury Palicejska-pamiežnaha departamienta (Politsei— ja Piirivalveamet, PPA) na talinskim pamiežnym punkcie na vulicy Logi — u rajonie pasažyrskaha porta. Zatrymańnie aformili na 48 hadzin, a samoha čałavieka pieravieźli ŭ centr utrymańnia PPA ŭ vioscy Soadevachie vołaści Rae (Harjumaa).

Pavodle materyjałaŭ spravy, Estoniju biełarus vykarystoŭvaŭ jak tranzitnuju krainu, kab trapić u Finlandyju, dzie płanavaŭ pracavać. Ekanamičnych i siamiejnych suviaziaŭ ni z Estonijaj, ni ź inšymi krainami Šenhiena ŭ jaho nie było.

U toj ža dzień, 12 sakavika, palicyja vydała jamu novaje pradpisańnie ab vyjeździe i dadatkova ŭviała zabaronu na ŭjezd terminam na piać hadoŭ.

Što zatrymany kazaŭ na dopycie i ŭ sudzie

Padčas hutarki 12 sakavika čałaviek pryznaŭ, što viedaŭ pra zabaronu Finlandyi i što mienavita praź jaje źmianiŭ svajo imia — kab znoŭ trapić u Šenhien. Jon pryznaŭ, što parušyŭ estonski Zakon ab zamiežnikach, znachodziačysia ŭ Šenhienskaj zonie biez zakonnaj padstavy.

Na sudovym pasiadžeńni 13 sakavika jaho pazicyja źmianiłasia. Čałaviek zajaviŭ, što z chadajnictvam palicyi zhodny, ale nie razumieje, čamu vysyłka zaciahvajecca. Jon śćviardžaŭ, što inšych imionaŭ u jaho nikoli nie było, a ŭ novym pašparcie imia prosta zapisana inakš, bo kiryličnaje napisańnie inakš pieradajecca łacinkaj. Novy pašpart jon nibyta aformiŭ tamu, što straciŭ papiaredni.

Sud paličyŭ hetyja tłumačeńni niepierakanaŭčymi: jany supiarečać raniejšym pakazańniam, dzie čałaviek prama kazaŭ, što źmianiŭ imia dziela paŭtornaha ŭjezdu. Zatrymany dadaŭ, što choča viarnucca dadomu ŭ Biełaruś, što maje dastatkova hrošaj arhanizavać pierajezd samastojna i hatovy da kanca pracedury žyć u niejkim miescy pražyvańnia, kali palicyja dazvolić.

U vyniku biełarusa pakinuli pad vartaj, kab arhanizavać departacyju. Praces pavinien byŭ zaniać nie bolš za miesiac.

• 0
• 0
• 4
• 2
• 0
• 1
• 0
• 0