«Moža, pryviedziacie ciahniki ŭ paradak?» Biełarusy skardziacca na pałomki «Štadleraŭ» paśla ich viartańnia na maršruty
Biełaruskaja čyhunka paviedamiła pra viartańnie «Štadleraŭ» paśla ramontu. Ale pasažyry ŭžo skardziacca na pałomki, zatrymki i pierasadki prosta padčas rejsaŭ, piša BGmedia.
Dźvie pałomki za adzin dzień
Pra adzin z takich vypadkaŭ raskazaŭ vydańniu «Štodzień» žychar Homiela, jaki za adzin dzień sutyknuŭsia adrazu ź dźviuma niaspraŭnaściami padčas pajezdki pamiž Homielem i Minskam.
Pavodle słoŭ pasažyra, ranicaj 8 červienia jon jechaŭ ciahnikom Homiel — Minsk z adpraŭleńniem u 04:41 i prybyćciom u stalicu ŭ 07:53.
Adnak da kančatkovaha punkta pryznačeńnia pasažyry svoječasova nie dabralisia.
«Dajechali da Asipovičaŭ — tam ciahnik złamaŭsia. Nas pierasadzili ŭ ekanom-kłas, i ŭ Minsk my prybyli prykładna na paŭtary hadziny paźniej», — raskazaŭ jon.
Na hetym prablemy nie skončylisia.
U toj ža dzień mužčyna viartaŭsia nazad ciahnikom ź Minska, jaki adpraŭlaŭsia ŭ 14:57. Pavodle jaho słoŭ, padčas ruchu sastaŭ nieadnarazova rezka źnižaŭ chutkaść.
«Ciahnik pieryjadyčna na ŭsim šlachu skidaŭ chutkaść da 19 kiłamietraŭ za hadzinu, časam uvohule spyniaŭsia. Potym abviaścili zatrymku pa techničnych pryčynach. U Homiel my pryjechali na 45 chvilin paźniej», — paviedamiŭ pasažyr.
U vyniku za adzin dzień ahulnaja zatrymka skłała bolš za dźvie hadziny.
Pasažyry abmiarkoŭvajuć pracu «Štadleraŭ»
Pavodle słoŭ hamialčanina, u Minsku jon pačuŭ ad inšych ludziej, što padobnyja vypadki ŭ apošni čas nie adzinkavyja.
«Moža, pryviedziacie ciahniki ŭ paradak, a nie budziecie pisać pra toje, kolki novych, kłasnych i sučasnych «Štadleraŭ» vy zapuścili», — źviarnuŭsia jon da Biełaruskaj čyhunki.
U kamientarach mierkavańni padzialilisia. Častka karystalnikaŭ radujecca viartańniu chutkasnych elektraciahnikoŭ paśla praciahłaj adsutnaści na maršrutach.
Inšyja adznačajuć, što istotnaj roźnicy pamiž «Štadleram» i zvyčajnymi elektryčkami nie zaŭvažajuć, zatoje košt biletaŭ na bolš sučasny ruchomy sastaŭ vyšejšy.
Adkul uzialisia prablemy
Masavyja prablemy ź ciahnikami «Štadler» pačali abmiarkoŭvać jašče niekalki hadoŭ tamu. Paśla ŭviadzieńnia sankcyj suprać biełaruskaha dziaržaŭnaha pieravozčyka ŭźnikli składanaści z pastaŭkami nieabchodnych kamplektujučych i absłuhoŭvańniem častki ruchomaha składu.
U vyniku častka sučasnych elektraciahnikoŭ pieryjadyčna vyvodzicca z ekspłuatacyi dla ramontu, a na maršruty vychodziać bolš staryja sastavy. Dla pasažyraŭ heta aznačaje bolš praciahły čas u darozie i mienš kamfortnyja ŭmovy pajezdki.
Pry hetym Biełaruskaja čyhunka zvyčajna paviedamlaje pra «płanavyja ramonty» i nie raskryvaje maštaby techničnych prablem.
Kamientary