Źjaviŭsia poŭny tekst mierkavanaha amierykanska-iranskaha miemaranduma ab spynieńni vajny ŭ Iranie

Dakumient, jaki, jak śćviardžajecca, ujaŭlaje saboj tekst ramkavaha pahadnieńnia pamiž ZŠA i Iranam, što padlahaje padpisańniu ŭ Šviejcaryi ŭ piatnicu, i jaki pieršapačatkova byŭ apublikavany ŭ arabamoŭnych ŚMI, pryciahnuŭ u sieradu vialikuju ŭvahu, niahledziačy na toje što pakul nie byŭ aficyjna paćvierdžany ni Vašynhtonam, ni Tehieranam.

Prajekt z 14‑ci punktaŭ, jaki raspaŭsiudžvaŭsia na sustrečach G7 u Francyi i praduhledžvaje, što Tehieran abaviazvajecca nie stvarać jadziernuju zbroju, a Vašynhton abiacaje vydzielić 300 miljardaŭ dalaraŭ na adnaŭleńnie Irana, taksama naŭrad ci stanie kančatkovaj viersijaj, jakaja budzie aformlena na cyrymonii ŭ Šviejcaryi.

Prezident ZŠA Donald Tramp, miarkujučy pa ŭsim, byŭ razdražniony ŭciečkami i na palach samitu zajaviŭ žurnalistam, što «nichto nie viedaje, što heta (ździełka) takoje, ale jana budzie vielmi mocnaj». Jon taksama papiaredziŭ, što kali Iran nie budzie vykonvać umovy, ZŠA «viernucca da bambavańniaŭ».

Nižej pryvodzicca poŭny tekst prajekta pahadnieńnia.

Tekst prajekta pahadnieńnia

1. Isłamskaja Respublika Iran i Złučanyja Štaty Amieryki razam sa svaimi sajuźnikami ŭ ciapierašniaj vajnie pry padpisańni hetaha Miemaranduma ab uzajemarazumieńni abviaščajuć pra nieadkładnaje i pastajannaje spynieńnie vajny na ŭsich frantach, uklučajučy Livan, i biaruć na siabie abaviazacielstva nadalej nie rabić u dačynieńni adzin da adnaho nijakich varožych dziejańniaŭ, a taksama ŭstrymlivacca ad pahrozy siłaj abo prymianieńnia siły adzin suprać adnaho. Kančatkovaje pahadnieńnie paćvierdzić pałažeńni hetaha artykuła i astatnich artykułaŭ.
2. Isłamskaja Respublika Iran i Złučanyja Štaty abaviazvajucca pavažać suvierenitet i terytaryjalnuju cełasnaść adzin adnaho i ŭstrymlivacca ad umiašańnia va ŭnutranyja spravy adzin adnaho.
3. Isłamskaja Respublika Iran i Złučanyja Štaty abaviazvajucca vieści pieramovy i dasiahnuć kančatkovaha pahadnieńnia na praciahu maksimalnaha terminu ŭ 60 dzion. Hety termin moža być padoŭžany pa ŭzajemnaj zhodzie bakoŭ.
4. Nieadkładna paśla padpisańnia hetaha Miemaranduma ab uzajemarazumieńni Złučanyja Štaty zdymuć marskuju błakadu i nie dapuściać nijakich umiašańniaŭ abo pieraškod, nakiravanych suprać Isłamskaj Respubliki Iran, a taksama ŭ maksimalna mahčymy termin 30 dzion całkam adnoviać sudachodstva. Ruch sudnaŭ pavinien być praparcyjny abjomu marskoha trafiku Isłamskaj Respubliki Iran da pačatku vajny. Złučanyja Štaty taksama biaruć na siabie abaviazacielstva vyvieści svaje siły z prylehłych rajonaŭ na praciahu 30 dzion paśla zaklučeńnia kančatkovaha pahadnieńnia.
5. Paśla padpisańnia hetaha Miemaranduma ab uzajemarazumieńni Isłamskaja Respublika Iran nieadkładna prymie miery dla zabieśpiačeńnia adnaŭleńnia na praciahu 30 dzion ruchu handlovych sudnaŭ ź Piersidskaha zaliva ŭ Amanski zaliŭ i nazad u abjomach, jakija isnavali da vajny, z ulikam nieabchodnaści likvidacyi techničnych pieraškod i abiasškodžvańnia min, čym zojmiecca Iran.
6. Złučanyja Štaty sumiesna sa svaimi rehijanalnymi partniorami abaviazvajucca raspracavać uzhodnieny abodvuma bakami kompleksny płan adnaŭleńnia i ekanamičnaha raźvićcia Isłamskoj Respubliki Iran, jaki praduhledžvaje finansavańnie ŭ pamiery nie mienš za 300 miljardaŭ dalaraŭ. Miechanizm realizacyi hetaha płana jak častki kančatkovaho pahadnieńnia budzie vypracavany na praciahu 60 dzion.
7. Złučanyja Štaty abaviazvajucca ŭ adpaviednaści z hrafikam, jaki budzie ŭzhodnieny ŭ miežach kančatkovaha pahadnieńnia, spynić usie vidy sankcyj, što dziejničajuć u dačynieńni da Isłamskaj Respubliki Iran, uklučajučy rezalucyi Rady Biaśpieki AAN i Rady kiraŭnikoŭ Mižnarodnaha ahienctva pa atamnaj enierhii (MAHATE), a taksama ŭsie adnabakovyja sankcyi ZŠA, jak pieršasnyja, tak i druhasnyja.
8. Isłamskaja Respublika Iran paćviardžaje, što nikoli nie budzie vytvorcam jadziernaj zbroi. Isłamskaja Respublika Iran i Złučanyja Štaty damovilisia pra toje, što pytańnie ab uzbahačanym materyjale, a taksama ŭsie inšyja ŭzajemna ŭzhodnienyja pytańni, źviazanyja ź jadziernaj dziejnaściu, uklučajučy jadziernyja patreby Irana, buduć naležnym čynam urehulavanyja ŭ kančatkovym pahadnieńni; kančatkovaje pahadnieńnie zamacuje pałažeńni hetaha artykuła.
9. Isłamskaja Respublika Iran i Złučanyja Štaty pahadzilisia, što da zaklučeńnia kančatkovaha pahadnieńnia budzie zachoŭvacca status-kvo: Iran zachoŭvaje biahučyja paramietry svajoj jadziernaj prahramy, a Złučanyja Štaty nie buduć uvodzić suprać Irana novyja sankcyi i ŭzmacniać svaju vajskovuju prysutnaść u rehijonie.
10. Złučanyja Štaty biaruć na siabie abaviazacielstva, što adrazu paśla padpisańnia hetaha Miemaranduma ab uzajemarazumieńni i da daty admieny sankcyj Ministerstva finansaŭ ZŠA budzie vydavać dazvoły (waivers) na ekspart iranskaj nafty, naftachimičnaj pradukcyi i jaje vytvornych, a taksama na ŭsie spadarožnyja pasłuhi, uklučajučy bankaŭskija, strachavyja, transpartnyja i tamu padobnyja.
11. Złučanyja Štaty abaviazvajucca, što pa miery prasoŭvańnia pieramoŭ da zaklučeńnia kančatkovaha pahadnieńnia, zamarožanyja abo abmiežavanyja ŭ abarocie srodki i aktyvy Isłamskaj Respubliki Iran buduć razbłakavanyja i całkam dastupnyja. Hetyja srodki, niezaležna ad taho, znachodziacca jany na asnoŭnym rachunku ci pieraviedzienyja na inšyja rachunki, mohuć vykarystoŭvacca dla lubych kančatkovych vypłataŭ bienieficyjaram, vyznačanych Centralnym bankam Isłamskaj Respubliki Iran, i buduć całkam dastupnyja dla vykarystańnia. Złučanyja Štaty abaviazvajucca vydavać dla hetaha ŭsie nieabchodnyja dazvoły i licenzii.
12. Isłamskaja Respublika Iran i Złučanyja Štaty damovilisia pra stvareńnie miechanizma realizacyi, zaklikanaha zabiaśpiečyć paśpiachovaje vykanańnie Kančatkovaha pahadnieńnia i zachavańnie abaviazacielstvaŭ pa im u budučyni.
13. Paśla padpisańnia hetaha Miemaranduma ab uzajemarazumieńni i atrymańnia harantyj pačatku vykanańnia artykułaŭ 4, 5, 10 i 11 hetaha Miemaranduma, a taksama praciahu realizacyi praduhledžanych imi mier, Isłamskaja Respublika Iran i Złučanyja Štaty pačnuć pieramovy pa Kančatkovym pahadnieńni vyklučna ŭ častcy astatnich artykułaŭ.
14. Kančatkovaje pahadnieńnie budzie zaćvierdžana rezalucyjaj Rady Biaśpieki AAN, abaviazkovaj da vykanańnia.

• 0
• 0
• 0
• 0
• 0
• 0
• 0
• 0