Palicyja vyratavała ŭ Vjetnamie 400 katoŭ, jakich vieźli na zaboj dziela ježy
U krainie vykryli sietku zładziejaŭ, što krali puchnatych hadavancaŭ.
U Vjetnamie vyratavali bolš za 400 katoŭ, jakich, vierahodna, rychtavali da zaboju. Heta adbyłosia paśla taho, jak ułady likvidavali mierkavanuju sietku vykradalnikaŭ katoŭ, paviedamiła arhanizacyja abarony žyvioł, piša Bi-bi-si.
Dzieviać čałaviek byli aryštavanyja — palicyja zajaŭlaje, što «złačynnaja hrupa śpiecyjalizavałasia na kradziažy i zbory katoŭ», paviedamlaje AFP sa spasyłkaj na aficyjnaje vydańnie palicyi horada Chašymin.
Padčas rejdaŭ na minułym tydni ŭ pravincyi Tajniń i horadzie Chašymin pravaachoŭniki kanfiskavali bolš za 400 žyvych katoŭ i kala 80 miortvych žyvioł, zakansiervavanych u lodzie. Jašče 21 kata kanfiskavali na inšym abjekcie.
Spažyvańnie miasa sabak i katoŭ u Vjetnam źjaŭlajecca zakonnym, adnak pradaŭcy pavinny mieć dazvoły, jakija paćviardžajuć pachodžańnie žyvioł.
Palicyja paviedamiła, što vyjšła na śled hrupy 11 červienia paśla rasśledavańnia chvali kradziažoŭ svojskich hadavancaŭ u Chašyminie, paviedamlajuć miascovyja ŚMI.
Padazravanyja pryznalisia, što na praciahu apošnich troch hadoŭ łavili katoŭ pa ŭsim paŭdniovym Vjetnamie, paviedamiła palicyja. Pavodle danych śledstva, jany pieravozili vykradzienych katoŭ u časovyja punkty, paśla čaho pradavali ich handlaram. Ździełki adbyvalisia kožnyja dva-try dni.
Kala 40 vykradzienych katoŭ užo viarnulisia da svaich haspadaroŭ, paviedamiła Humane World for Animals u aŭtorak.
Arhanizacyja pachvaliła miascovyja ŭłady za «rašučyja dziejańni, jakija vyratavali žyćcio mnohim žyviołam», ale adznačyła, što častka žyvioł paśla zahinuła praź pieraniesieny stres. Taksama jana dadała, što zabiaśpiečvaje kormam i inšymi nieabchodnymi rečami žyvioł, jakich usio jašče ŭtrymlivajuć u palicyi jak rečavyja dokazy, pakul praciahvajecca sprava.
Palicyja paviedamiła, što rasśledavańnie praciahvajecca, i zaklikała žycharoŭ, jakija ličać, što ich katoŭ vykrali, źviartacca dla dapamohi ŭ identyfikacyi znojdzienych žyvioł.
Pavodle acenak Humane World for Animals, štohod u Vjetnamie dziela atrymańnia miasa adłoŭlivajuć, vykradajuć, pieravoziać i zabivajuć kala piaci miljonaŭ sabak i adnaho miljona katoŭ.
Arhanizacyja adznačaje, što svojskich hadavancaŭ časta kraduć prosta z dvaroŭ i damoŭ: sabak niaredka zabirajuć z vykarystańniem atručanaj prynady, elektrašokieraŭ i žaleznych ščypcoŭ, a katoŭ — pry dapamozie spružynnych pastak.
Choć spažyvańnie miasa sabak i katoŭ u Vjetnamie zastajecca bolš raspaŭsiudžanym, čym u niekatorych inšych azijackich krainach, aktyvisty śćviardžajuć, što staŭleńnie hramadstva pastupova źmianiajecca.
Apytańnie 2023 hoda, zamoŭlenaje Humane World for Animals, pakazała rost hramadskaha supracivu takoj praktycy, asabliva siarod moładzi i ŭładalnikaŭ svojskich žyvioł. Bolšaść apytanych padtrymlivaje zabaronu handlu jak sabačym, tak i kacinym miasam.
Kamientary