Raspracoŭščyk niejrasietki Claude — startap Anthropic — pryciahnuŭ $65 młrd u vośmym raŭndzie finansavańnia (sieryja H). U vyniku acenka kampanii vyrasła da rekordnych $965 młrd.
Heta dazvoliła abyści hałoŭnaha kankurenta OpenAI i atrymać status samaha darahoha ŠI-biznesu ŭ śviecie, piša Office Life.
Finansavy raŭnd uznačalili ciažkavahaviki vienčurnaha rynku: Altimeter Capital, Dragoneer, Greenoaks i Sequoia Capital. U ździełcy taksama ŭdzielničali najbujniejšyja suśvietnyja fondy, uklučajučy Temasek i Fidelity, a jašče $15 młrd skłali raniej paćvierdžanyja ŭlivańni ad technałahičnych hihantaŭ na čale z Amazon.
Rost cikavaści inviestaraŭ źviazany z pakazčykami Anthropic. Pa słovach finansavaha dyrektara kampanii Kryšny Raa, u mai biahučy hadavy dachod ŠI-raspracoŭščyka pieravysiŭ adznaku ŭ $47 młrd. Z momantu papiaredniaha raŭnda finansavańnia ŭ lutym popyt z boku hłabalnych karparacyj vyras u niekalki razoŭ.
Pryciahnutyja miljardy Anthropic nakiruje na pašyreńnie vyličalnych mahutnaściaŭ. Kampanija ŭžo padpisała pahadnieńni na pastaŭku 5 HVt enierhii ad Amazon, anałahičnyja kantrakty na TPU-čypy nastupnaha pakaleńnia z Google i Broadcom, a taksama damoviłasia sa SpaceX ab arendzie GPU-masivaŭ na supierkampjutarach Colossus 1 i Colossus 2.
Novy raŭnd Anthropic supaŭ z padrychtoŭkaj najbujniejšych technałahičnych listynhaŭ. Raniej stała viadoma, što OpenAI płanuje vosieńskaje IPO z metavaj acenkaj da $1 trłn na fonie prahnazujemaha strataŭ u $14 młrd za 2026 hod.
Dziejańni Anthropic pazbaŭlajuć stvaralnikaŭ ChatGPT statusu samaha darahoha startapa i stvarajuć kankurencyju za kapitał fondaŭ. Charakterna, što ŭ ŠI-honcy zadziejničana i SpaceX Iłana Maska. Aerakaśmičnaja kampanija, jakaja niadaŭna padała zajaŭku na IPO, adnačasova raźvivaje ŭłasny stratny ŠI-prajekt i zdaje vyličalnyja sierviery Anthropic.
Ciapier čytajuć
Adzin z zahinułych siońnia vajskoŭcaŭ — 26‑hadovy minčuk Kirył. Što pra jaho viadoma8
Kamientary