Zakopvali majtki, smarkalisia, vynachodzili pisuar biez pyrskaŭ i nastupali na źmiej — za što razdali Šnobieli-2026

Šnobieleŭskaja premija była zasnavanaja časopisam Annals of Improbable Research jak parodyja na Nobieleŭskuju. Adnak uznaharody ŭručajuć za sapraŭdnyja navukovyja pracy.

36‑ia cyrymonija ŭpieršyniu prajšła nie ŭ ZŠA, a ŭ Jeŭropie. Arhanizatary pieranieśli jaje ŭ Ciurych praz składanaści z atrymańniem amierykanskich viz i zajavili, što pajezdki ŭ ZŠA stali niebiaśpiečnymi dla zamiežnych łaŭreataŭ i haściej.

Temaj sioletniaj cyrymonii stali hryby. Sapraŭdnyja nobieleŭskija łaŭreaty, apranutyja hrybami, vykanali opiernuju pieśniu, a 1500 hledačoŭ pa tradycyi zakidali scenu papiarovymi samalocikami. Pieramožcam uručyli statuetki ŭ vyhladzie hryba z čałaviečaj stupnioj i kupiuru naminałam 10 tryljonaŭ zimbabvijskich dołaraŭ, jakaja ŭžo nie maje hrašovaj vartaści.

Premiju pa ekanomicy atrymali daśledčyki, jakija sabrali dokazy taho, što ludzi z vyšejšych sacyjalnych słajoŭ čaściej pavodziać siabie nieetyčna. Navukoŭcy nazirali za pavodzinami kiroŭcaŭ darahich aŭtamabilaŭ na skryžavańniach i piešachodnych pierachodach, a taksama prapanoŭvali ŭdzielnikam ekśpierymientu ŭziać cukierki ź miski, papiaredziŭšy, što jany pryznačanyja dzieciam.

Vyśvietliłasia, što zamožnyja ŭdzielniki zabirali amal udvaja bolš dziciačych cukierak. Jany taksama čaściej nie sastupali darohu inšym kiroŭcam i piešachodam i byli bolš schilnyja chłusić dziela ŭłasnaj vyhady.

Chimičnuju premiju prysudzili mižnarodnaj hrupie navukoŭcaŭ, jakaja daśledavała tak zvanaje małako žyvarodnych tarakanaŭ Diploptera punctata. Samki hetaha vidu kormiać embryjony vadkaściu, bahataj na białki, tłuščy i cukar. Hetaja vadkaść utrymlivaje utraja bolš enierhii, čym roŭnaja joj kolkaść karovinaha małaka.

U farmaceŭtyčnaj katehoryi pieramahła japonskaja praca 1977 hoda pra aeradynamiku smarkańnia. Daśledčyki vymiarali chutkaść pavietra i cisk u vušnym kanale i pryjšli da vysnovy, što smarkacca lepš pa čarzie praz kožnuju nozdru, papiarednie zrabiŭšy nievialiki ŭdych.

Premiju pa fizicy atrymali stvaralniki pisuara, jaki nie raspyrskvaje vadkaść. Ekśpierymienty pakazali, što pyrski praktyčna źnikajuć, kali strumień traplaje na pavierchniu pad vuhłom mienš za 30 hradusaŭ. Navukoŭcy stvaryli vyhnutuju kanstrukcyju, jakaja zachoŭvaje patrebny vuhał niezaležna ad rostu čałavieka.

Pavialičyć

Technałahičnaj premijaj adznačyli «niekradruk» — vykarystańnie chabatka miortvaha kamara ŭ jakaści zvyštonkaha sopła dla 3D-pryntara.

Premiju pa hlebaznaŭstvie dali navukoŭcam, jakija z dapamohaj tysiačy dobraachvotnikaŭ zakapali adnolkavyja bavaŭnianyja trusy bolš čym u 25 krainach. Praź miesiac i dva miesiacy bializnu vykopvali i praviarali, nakolki jana raskłałasia. Čym aktyŭniejšyja hlebavyja mikraarhanizmy, tym mienš tkaniny zastavałasia. Hety pakazčyk nazvali «indeksam majtkoŭ».

Bijamiechaničnuju premiju atrymała daśledavańnie evalucyi pacałunkaŭ. Navukoŭcam spačatku daviałosia dać im strohuju navukovuju definicyju: nieahresiŭny kantakt rot u rot pamiž pradstaŭnikami adnaho vidu, jaki supravadžajecca ruchami vusnaŭ, ale nie pieradačaj ježy. Praanalizavaŭšy pavodziny prymataŭ, aŭtary pryjšli da vysnovy, što całavacca mahli jašče ahulnyja prodki čałaviekapadobnych małpaŭ, a paźniej — nieandertalcy.

Bijałahičnuju premiju prysudzili brazilskim daśledčykam, jakija ŭ achoŭnych botach aściarožna nastupali na roznyja častki cieła atrutnych źmiej, kab vyśvietlić, kali tyja najbolš schilnyja kusacca. Čaściej za ŭsio źmiei atakavali, kali im nastupali na hałavu. Paźniej artykuł adklikali z navukovaha časopisa: ekśpierymient nie mieŭ nieabchodnaha etyčnaha dazvołu.

Premiju ŭ halinie niuchu atrymali aŭtary apytańnia, pavodle jakoha baćkam padabajecca pach maleńkich dziaciej, ale z uzrostam dziciaci pryjemnaść jaho pachu pastupova źnižajecca. Asabliva rezka baćkoŭskija acenki paharšalisia, kali dzieci stanavilisia padletkami.

Premija miru dastałasia daśledavańniu siabroŭstva. Ekśpierymienty pakazali, što ludzi chočuć bačyć siabroŭ dobrymi i nadziejnymi ŭ adnosinach da siabie, ale časta addajuć pieravahu, kab tyja pavodzili siabie žorstka ź ich vorahami. Jak sfarmulavała adna z aŭtarak, časam ludzi adčuvajuć asablivuju padtrymku, kali siabry hatovyja «nienavidzieć za ich».

• 4
• 0
• 5
• 0
• 0
• 0
• 0
• 0