Pieršaja zamiežnaja avijakampanija spyniła paloty ŭ Rasiju paśla papiaredžańnia Zialenskaha pra niebiaśpieku ŭ niebie
Air Tanzania prypyniła paloty pamiž Dar-es-Sałamam i Maskvoj, spasłaŭšysia na acenku ryzyk i biaśpieku pasažyraŭ. Heta pieršaja zamiežnaja avijakampanija, jakaja admoviłasia ad rejsaŭ u Rasiju paśla papiaredžańnia Uładzimira Zialenskaha pra niebiaśpieku rasijskaj pavietranaj prastory.
Rejsy TC422 i TC423 prypynienyja z 4 vieraśnia na niavyznačany termin, paviedamiła Air Tanzania. Kampanija patłumačyła, što pryniała rašeńnie paśla płanavaj acenki ryzyk na maršrucie.
«Air Tanzania pastajanna pravodzić takija acenki pa ŭsioj svajoj maršrutnaj sietcy, i kali vynik śviedčyć na karyść paŭzy, my jaje robim. Mierkavańni biaśpieki zaŭsiody majuć pieravahu nad kamiercyjnymi», — havorycca ŭ paviedamleńni pieravozčyka.
Pasažyram prapanavali całkam viarnuć hrošy abo biaspłatna pieranieści palot na inšuju datu ci vybrać inšy maršrut.
Kali rejsy adnoviacca, nieviadoma.
Pramyja paloty pamiž Tanzanijaj i Rasijaj zapuścili tolki ŭ lipieni 2026 hoda — paśla pierapynku, jaki pačaŭsia padčas pandemii karanavirusa. Samaloty Boeing 787 Dreamliner pavinny byli try razy na tydzień lotać pa maršrucie Dar-es-Sałam — Maskva — Zanzibar.
Rasavijacyja nazyvała prychod Air Tanzania «vielmi dobrym krokam u raźvićci avijacyjnaj dastupnaści ŭsiaho Afrykanskaha kantynienta». U pierśpiektyvie rasijskija čynoŭniki razhladali mahčymaść praciahnuć maršrut da Siejšelskich astravoŭ.
Tanzanija papularnaja siarod rasijan dziakujučy safary-parkam i kurortam Zanzibara. Air Tanzania była adzinym pieravozčykam, jaki vykonvaŭ pramyja rejsy pamiž krainami, piša «Baza».
Raniej Uładzimir Zialenski papiaredziŭ zamiežnyja avijakampanii i strachoŭščykaŭ, što paloty ŭ Rasiju, pieradusim u Maskvu i Sankt-Pieciarburh, stanoviacca ŭsio bolš ryzykoŭnymi praz pašyreńnie ŭkrainskich atak dronami. Pavodle jaho, «rasijskaje nieba de-fakta budzie zakryvacca». Pry hetym jon padkreśliŭ, što Ukraina nie źbirajecca atakavać cyvilnyja samaloty.
2 vieraśnia tureckaja Pegasus admianiła bolš za dziesiać rejsaŭ u Rasiju, ale patłumačyła heta «techničnymi apieracyjnymi pryčynami» i paśla nie praciahnuła admieny. Jašče da zajavy Zialenskaha izrailskaja El Al spyniła paloty ŭ Maskvu ź mierkavańniaŭ biaśpieki.
Ciapier čytajuć
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni5
Kamientary