У расіяніна скралі навушнікі ў цягніку Мінск-Масква — цяпер яны ўсплылі ў Баранавічах
Расіянін папрасіў беларусаў дапамагчы вярнуць навушнікі Apple, якія зніклі ў яго ў цягніку Мінск-Масква. Дзякуючы геалакацыі мужчына высветліў, што цяпер AirPods знаходзяцца ў Баранавічах. Беларусы жартуюць — спачатку вярніце крыж Еўфрасінні Полацкай.
«Паважаныя беларускія сябры! Мае навушнікі Apple скралі 27 верасня ў цягніку Мінск-Масква», — напісаў мужчына ў Трэдс.
Паводле яго, цяпер навушнікамі карыстаецца чалавек, які жыве насупраць баранавіцкага супермаркета «Карона». Да допісу расіянін прыклаў скрыншоты з праграмы «Лакатар»: прылада паказваецца ў раёне вуліцы Наканечнікава.
Сам расіянін цяпер знаходзіцца ў Кітаі і плануе вярнуцца ў Беларусь праз два месяцы. Ён пацікавіўся, як можна забраць сваю рэч, і выказаў спадзеў на «вельмі строгія законы наконт крадзяжу і незаконнага прысваення чужой маёмасці».
Некаторыя параілі мужчыну пакінуць AirPods у рэжыме згубленай прылады, каб на экране таго, хто паспрабуе імі скарыстацца, з’явіліся кантактныя даныя ўладальніка. Адзін з каментатараў расказаў падобную гісторыю: у яго скралі заплечнік з iPad, але пасля званка ў міліцыю рэчы вярнулі так хутка, што ён не паспеў даесці заказ у «Макдональдсе».
«Таму тэлефануйце ў міліцыю. Можа, вам пашанцуе, і, нягледзячы на тое, што вы за мяжой, ваш зварот прымуць», — параіў ён.
Аўтар патлумачыў, што яшчэ ў цягніку перавёў AirPods у рэжым згубленай прылады, але спяшаўся на самалёт і таму не паспеў адразу звярнуцца «ў паліцыю».
Але найбольшую падтрымку набраў каментар «Вярніце крыж Еўфрасінні Полацкай, потым пагаворым» — ён атрымаў больш за 630 лайкаў.
Знайшліся і тыя, хто быў гатовы дапамагчы больш прадметна. Адна з жыхарак Баранавічаў напісала, што знаходзіцца прыкладна за 500 метраў ад навушнікаў, але сама забраць іх не можа: «Толькі міліцыя». Калі яе спыталі, чаму б проста не схадзіць па прыладу, жанчына папрасіла дакладны адрас і заўважыла, што, мяркуючы па геалакацыі, навушнікі ўвогуле ляжаць на паркоўцы.
А некаторыя засумняваліся ў версіі пра крадзеж.
«Можа, не скралі, а нехта згубіў?» — спыталі ў аўтара. Іншыя заўважылі, што чалавек, у якога цяпер знаходзяцца AirPods, мог знайсці іх у цягніку ці набыць у кагосьці, не ведаючы пра іх паходжанне. Таму геалакацыя сама па сабе яшчэ не даказвае, хто і пры якіх абставінах іх забраў.
Каментары