«Čamu b nie praciahnuć Zoom». Dyzajnierka z Kijeva vypadkova źniała prylot rasijskaha drona padčas anłajn-zaniatkaŭ
Uviečary ŭ paniadziełak rasijski ŭdarny dron vybuchnuŭ kala 25‑paviarchovaha žyłoha doma ŭ Kijevie. U hety momant dyzajnierka Lizavieta Braŭn pravodziła anłajn-zaniatki i vypadkova zafiksavała vybuch na videa. Jaje reakcyja na prylot stała virusnaj u sacyjalnych sietkach.
Radyjo Svaboda pahavaryła ź Lizavietaj Braŭn pra toje, što adbyvałasia ŭ tyja chviliny i čamu jana spačatku navat nie ŭśviadomiła, nakolki niebiaśpiečnaj była situacyja.
«Ja žyvaja, usio narmalna. Čamu b nie praciahnuć Zoom?»
Padčas zaniatkaŭ Lizavieta była na svaim zvyčajnym pracoŭnym miescy ŭ kvatery. Anłajn-sustreča tolki pačałasia.
Udzielniki dałučalisia da zvanka, kali ŭ Kijevie abviaścili pavietranuju tryvohu. Vybuch supaŭ z pavietranaj tryvohaj, i času, kab uśviadomić niebiaśpieku, praktyčna nie było.
«Dzieści praz čatyry chviliny paśla pačatku zvanka pačynajecca tryvoha. I ŭ tuju ž chvilinu ja baču, jak niešta lacić. Ja hladžu zboku i navat nie razumieju, u jaki bok jano ruchajecca, bo mnie zdajecca, što heta jašče vielmi daloka. Ale litaralna praź dźvie siekundy ŭžo adbyvajecca prylot — zusim pobač», — raskazvaje Lizavieta.
Na videa, jakoje razyšłosia pa sacyjalnych sietkach, Lizavieta emacyjna reahuje na toje, što adbyłosia, ale pry hetym sprabuje praciahvać razmovu z udzielnikami anłajn-zaniatkaŭ. Ludzi, jakija byli ź joju na suviazi, prapanoŭvali spynić zvanok i pieranieści sustreču.
Sama Lizavieta ŭ toj momant usprymała situacyju inakš.
«Kali adbyŭsia prylot, ja pierabiła čałavieka i na emocyjach sprabavała niešta skazać. Mianie sprabavali spynić: «Okiej, Liza, davaj praciahniem paźniej, pieraniasiem Zoom». Ale dla mianie ŭ toj momant usio vyhladała tak, byccam ničoha nie adbyłosia. Nu, ja ž žyvaja, usio narmalna. Čamu b nie praciahnuć Zoom?» — kaža jana.
Pavodle Lizaviety, zboku jaje reakcyja mahła vyhladać tak, nibyta jana zastajecca spakojnaj i navat viesialicca. Adnak jana sama tady nie całkam uśviedamlała, što adbyvajecca. Na jaje stan mahli ŭpłyvać adrenalin i šok paśla vybuchu.
«Ja vielmi emacyjna sprabavała pakazać, što ŭ mianie ŭsio cudoŭna i što my možam praciahvać. Ale ŭ kvatery ŭžo byŭ dym. Mahčyma, praz heta ja taksama jašče nie ŭsio razumieła», — raskazvaje dyzajnierka.
Anłajn-zaniatki praciahvalisia ŭsiaho kala vaśmi chvilin. Paśla vybuchu Lizavieta nie adrazu spyniła zvanok: joj zdavałasia, što kali jana sama nie paciarpieła, to možna viarnucca da pracy.
Jana pierajšła ŭ vanny pakoj i vyrašyła, što sustreču ŭsio ž treba pieranieści. Prykładna praz čatyry-piać chvilin paśla zakančeńnia zvanka Lizavieta paviedamiła ŭdzielnikam, što zaniatki adbuducca ŭ inšy dzień.
«Dla mianie heta vyhladała tak, byccam usio dobra: ja vyžyła, staju ŭ vannym pakoi, tryvoha ŭžo skončyłasia. Ja prosta padumała, što my možam praciahnuć Zoom. Choć ludzi bačyli, što sa mnoj niešta nie tak», — kaža jana.
Ciapier Lizavieta razumieje, što dla hledačoŭ videa jaje reakcyja mahła vyhladać zusim inakš, čym jana sama adčuvała siabie ŭ toj momant.
«Kali ty pieražyvaješ takija padziei, a potym pačynaješ uśviedamlać, u jakoj situacyi apynułasia, heta davoli strašna», — pryznajecca jana.
Niahledziačy na vybuch pobač z domam, Lizavieta nie paciarpieła. Jana kaža, što joj vielmi pašancavała: vokny ŭ kvatery zastalisia cełymi.
«Ja siadžu na tym samym miescy. Tut usio cudoŭna. Mnie vielmi pašancavała, što vokny nie vybiła. U mianie całkam cudoŭny nastroj i sa mnoj usio dobra», — skazała jana paśla zdareńnia.
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju88
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju8
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im1414
Kamientary